TARGET ng dalawang kapulungan ng Kongreso na maratipikahan ang 2022 national budget na nagkakahalaga ng P5.024 trillion, sa susunod na linggo, partikular na sa Disyembre 13, 2021.
Ito ang nabatid mula kay House Committee on Appropriation Chairman Eric Yap sa ambush interview kahapon matapos simulan ang Bicameral Conference meeting ng Kamara at Senado hinggil sa 2022 General Appropriation Bill (GAB).
“Target lang namin is December 13 pero para maipasok siya ng hopefully by Christmas ma-sign ni President ‘yung budget,” ani Yap.
Ang Kongreso ay nakatakdang magbakasyon mula Disyembre 15, 2021 para sa Christmas break at muling babalik ang mga ito sa ikalawang linggo ng Enero 2022.
Umaasa naman si House majority leader Martin Romualdez na magkakasundo ang mga contingent ng Senado at Kamara sa Bicameral Conference upang masigurong hindi magkaroon ng delay o kaya ay reenacted budget sa susunod na taon.
“It is to the best interest of our people that the 2022 General Appropriations Act be signed by President Duterte before the end of the year so as to avoid a reenacted budget in 2022,” pahayag ni Romualdez.
Isa sa mga isyu sa pambansang pondo ay ang budget ng National Task Force-End Local Communist Armed Conflict (NTF-ELCAC) dahil P29 billion ang inaprubahan ng Kamara habang P4 billion lamang sa Senado.
(BERNARD TAGUINOD)
155 
