NAKIPAG-UGNAYAN ang Philippine Coast Guard sa PNP Maritime Police kaugnay sa pagsagip sa 19 na biktima ng human trafficking sa Bongao, Central Tawi-Tawi.

Ayon sa PCG, nasagip ang mga biktima nang matunton ang kanilang kinaroroonan sa Port of Bongao, Tawi-Tawi, na hinihinalang nakatakda nang maglayag papuntang Malaysia.

Inalerto ng PCG ang Maritime Police at Maritime Inter-Agency Council Against Trafficking tungkol sa pagsagip sa mga biktima mula sa barkong MV Ever Queen of Asia na naka-angkla sa bayan ng Bongao.

Sinasabing pawang na-recruit ang mga biktima sa Zamboanga Peninsula.

Matapos sumailalim sa medical examination at imbestigasyon ay agad nai-turnover sa Ministry of Social Service and Development sa Bongao ang mga biktima para sa psychological counseling and assistance at pagpapauwi sa kanilang lugar. (JESSE KABEL RUIZ)