Abot-langit ang aming poot at pighati sa walang-awang pagpaslang kay Bernardino “Tay Toto” Patigas Sr., incumbent city councilor ng Escalante City, Negros Occidental. Siya ay walang-awang pinagbabaril habang siya ay lulan ng motorsiklo noong Lunes, ika-22 ng Abril. Siya ay 72 taong gulang.
Hindi lamang ordinaryong public servant si Tay Toto. Siya ay survivor ng Escalante Massacre noong 1985, ito ang pamamaril sa kilos-protestang isinagawa sa ika-13 taon ng Martial Law. Nasa 20 katao ang namatay sa insidente. Binigay ni Tay Toto ang kanyang buong buhay at lakas sa paglilingkod sa mga sakada ng Negros. Siya ay naging secretary general ng North Negros Alliance of Human Rights Advocates (NNAHRA), at itinalaga rin siyang Escalante City Coordinator ng Bayan Muna Party-list mula pa 2010. Kalaunan, siya ay inihalal na miyembro ng Sangguniang Panlungsod ng Escalante City.
Tulad ng iba pang human rights defender na gaya niya, siya ay nakatanggap ng mga death threats, ng mga gawa-gawang kaso, at iba pang harassment. Noon lamang Abril 2018, ang kanyang larawan at pangalan ay inilagay sa isang poster ng diumano ay mga “communist personalities.” Si Atty. Benjamin Ramos, isang human rights lawyer, ay nakasama rin sa nasabing poster. Siya ay pinaslang noong November 2018.
Si Tatay Toto ay pang-apat na sa mga kampanyador ng Bayan Muna at ni Neri Colmenares na pinaslang nitong mga nakaraang buwan. Si Randy Felix Malayao, Bayan Muna coordinator sa Cagayan Valley at isa ring peace consultant, ay pinaslang noong Enero 30. Noong March 12 naman ay pinaslang ang coordinator ng Bayan Muna sa Borongan, Eastern Samar. Pinatay naman ang kampanyador ni Neri Colmenares sa Masbate na si Ruben Corot noong April 16.
Ang mga pagpatay na ito ay sabay sa kumpas ng red-tagging at paninira na ginagawa ng mga militar tulad ni Brig. Gen. Antonio Parlade. Ang kanyang mga walang-batayang paratang at kasinungalingan ay naglalagay sa mga miyembro, kampanyador, at tagasuporta ng Bayan Muna at ng iba pang progresibong kandidato sa panganib!
Hustisya para kay Tay Toto Patigas! (Kakampi Mo ang Bayan / TEDDY CASIÑO)
89
