UPANG matiyak ang suplay ng palay, inihayag ng Department of Agriculture na maaaring kailanganin ng gobyerno na dagdagan ang badyet para sa mga subsidyo ng pataba sa taong ito o maaaring mauwi ang Pilipinas sa pagbawas sa output ng palay (unhusked rice).
Sa press briefing nitong Miyerkoles, sinabi ni outgoing Agriculture Secretary William Dar na ang papasok na administrasyon ay kailangang maglaan ng P15 bilyon para mapanatili ang mataas na record ng produksyon ng mga magsasaka ng palay.
Sinabi pa ng papalabas na Agriculture chief na ang produksyon ng bigas ng bansa noong 2021 ay umabot sa 19.96 million metric tons (MT), na lumampas sa dating record high level na 19.29 million MT noong nakaraang taon, base sa datos ng Philippine Statistics Authority.
“Ayon sa pinakahuling kalkulasyon kung gusto natin ng sustained level of productivity at production volume tulad noong nakaraang taon kung hindi mas mahusay na 19 million MT, at sa balanseng fertilization strategy na binabawasan ang 50 percent ng chemical fertilizer na may biofertilizer, kailangan mong gumastos ng P15 billion,” sinabi ni Dar sa mga mamamahayag.
Ayon pa sa opisyal, bumaba ng 6.8 porsyento ang ani ng palay sa unang semestre. Isinasalin ito sa pagbawas ng 1.1 milyong MT hanggang 1.3 milyong MT o halos 842,000 MT ng bigas.
Ang pagbaba ng output ay dahilan sa mababang paggamit ng pataba ng mga magsasaka ng palay dulot naman ng pagtaas ng presyo nito.
Batay sa datos ng Fertilizer and Pesticide Authority, ang presyo ng urea, ang pinakakaraniwang ginagamit na fertilizer grade, noong Hunyo 6 hanggang 10 ay nag-average ng P2,943.63 kada 50-kilo bag, tumaas ng 143.9 porsyento mula sa P1,207.14 lamang kada 50-kilo na bag noong isang taon. (PAOLO SANTOS)
268 
