CAVITE – Tinatayang mahigit sa P100,000 halaga ng hinihinalang shabu ang nasamsam sa dalawang arestadong hinihinalang tulak ng ilegal na droga at nasa listahan ng Street Level Individuals (SLIs), sa isinagawang buy-bust operation sa Dasmariñas City noong Sabado ng gabi.

Kinilala ang arestadong mga suspek na sina Matt Lorenz Figuracion at Artemio Tandas y Cacayuran, kapwa nasa hustong edad.

Ayon sa ulat, dakong alas-9:00 ng gabi, nagsagawa ng buy-bust operation ang mga operatiba ng Dasmariñas City Police sa Brgy. Sampaloc 4, Dasmariñas City na nagresulta sa pagkakadakip sa mga suspek.

Nakumpiska sa mga suspek ang tinatatayang 15.50 gramo ng hinihinalang shabu na may street value na P105,400, at ang ginamit na buy-bust money.

Kasong paglabag sa RA 9165 o Comprehensive Dangerous Drugs Act of 2002 ang kinahaharap ng mga suspek. (SIGFRED ADSUARA)