(NI KEVIN COLLANTES)

PORMAL nang sinimulan nitong Lunes ng fact-finding committee na binuo ng Light Rail Transit Authority (LRTA) ang imbestigasyon hinggil sa insidente ng banggaan ng dalawang tren ng LRT-2, nitong Sabado ng gabi, na nagresulta sa pagkasugat ng 34 na katao.

Ayon kay LRTA spokesperson Hernando Cabrera, kabilang sa aalamin ng Komite ay kung paanong nag-disengage ang preno ng ‘dead train’.

Tutukuyin din aniya ang bilis ng tren nang maganap ang banggaan, gayundin ang ‘incline’ o pagkakahilig ng riles sa lugar.

Sinabi ni Cabrera na inaasahan nilang magtatagal ang imbestigasyon hanggang ngayong Martes, at Miyerkoles ay makapaglalabas na ang komite ng ulat hinggil sa pangyayari.

“‘Yung fact-finding committee mag-start ng Lunes ‘yan and we expect na hanggang bukas (Martes) matapos ‘yung kanilang imbestigasyon,” ani Cabrera, sa panayam sa telebisyon.

“By Wednesday meron na silang report. ‘Yun ang target namin. In fact, bine-base namin ‘yon sa mga nakaraan naming experience. Usually binibigyan kami ng 48-hours na gawin ‘yung imbestigasyon at gawin ang report,” aniya pa.

Binigyang-diin din naman ni Cabrera na tulad ng sinabi ni Transportation Secretary Arthur Tugade ay hindi nila ipinagsasawalang bahala ang pangyayari.

Ayon kay Cabrera, napakaseryosong bagay ito dahil sangkot dito ang kaligtasan ng kanilang mga pasahero kaya’t kailangan na maimbestigahan ito at malaman ang katotohanan kung ano talagang nangyari kung bakit umandar mag-isa ang tren.

Nabatid na hanggang nitong Lunes ay lima pang indibidwal ang nananatiling naka-confine sa pagamutan dahil sa aksidente, kabilang ang isang Grade 8 student, na nag-crack ang panga at kinakailangang sumailalim sa operasyon.  Hiniling na rin umano ng pamilya nito na sa Ilocos na lamang isagawa ang operasyon.

Ang isa pang biktima ay dumaranas naman ng muscle spasm, isang pasyente ang may traumatic anxiety, isang nagkaroon ng dislocated shoulder, at isang LRTA teller na nagtamo ng broken arm.

Matatandaang una naman nang nakalabas ng pagamutan ang 29 iba pang pasahero na pawang nagtamo lamang ng minor injuries.

Kaugnay nito, iniulat na rin ni Cabrera na normal naman na ang operasyon ng LRT-2 ngunit dahil sa aksidente ay pito lamang umano ang mga tren ng LRT-2 ang bumibiyahe.

Dahil dito, inaasahan na aniya nilang kinakailangan ng kanilang mga pasahero na maghintay ng matagal bago makasakay ng tren.

Nabatid na ang LRT-2 ay may 10 tren, kabilang dito ang dalawang nasangkot sa aksidente habang ang isa naman ay sumasailalim sa preventive maintenance.

Una naman nang humingi ng paumanhin ang LRTA sa pangyayari at tiniyak na sasagutin nila ang mga gastusin sa pagpapagamot, maging loss of income ng mga nasaktan sa aksidente.

Nanindigan rin ito na ‘generally safe’ pa rin ang LRT-2 sa kabila nang naganap na banggaan.

Isolated incident rin lamang anila ito, at ito ang kauna-unahang pagkakataon na dumanas ng ganitong aksidente ang LRT-2 sa loob ng 15-taong operasyon nito.

“Isolated incident po ito. Generally, iyung ating mga train are safe, iyung ating system safe din po s’ya,” ani Cabrera.