BUKOD sa mga pribadong organisasyon sa bansa, tutulong ang Global Fund sa Pilipinas para sa immunization campaign laban sa COVID-19 kapag mayroon nang bakuna.

Ito ang tiniyak ni House Committee on Health Vice Chairman Mike Defensor habang ang gobyerno ay naghahanda katuwang ang pribadong mga negosyante para sa immunization campaign sa sandaling dumating na ang bakuna sa COVID-19.

Ang Global Fund ang nasa likod ng paglaban sa Human Immunodeficiency Virus (HIV) at Acquired Immune Deficiency Syndrome (HIV-AIDS) tuberculosis at malaria.

“The fund will help us because the coronavirus disease is already overwhelming our public health system and derailing our efforts to suppress AIDS, and even tuberculosis,” ani Defensor.

Unang sinabi ni Defensor na naudlot ang kampanya laban sa HIV-AIDS dahil sa pandemya sa COVID-19 na labis na ikinahabala ng mambabatas at maging ang nasabing ogranisasyon.

Dahil dito, tutulong umano ang Global Fund sa Pilipinas sa pagpapabakuna sa nakararaming Filipino laban sa COVID-19 upang hindi tuluyang madiskaril ang anti-HIV/AIDS campaign sa bansa.

“They are already helping us now in the fight to suppress COVID-19, mainly through donations of GeneXpert PCR machines and Xpert Xpress test kits. They will surely help us some more in the vaccination,” dagdag pa ni Defensor. (BERNARD TAGUINOD)