CAVITE – Binawian ng buhay ang isang 65-anyos na senior citizen nang bumangga ang sinasakyang L300 van na minamaneho ng kanyang anak sa isang nakaparadang trailer van sa pakurbadang bahagi ng kalsada sa Imus City nitong Biyernes ng madaling araw.

Kinilala ang namatay na si Arnel Cruz, Sr. habang sugatan ang anak nitong si Arnel Joseph Cruz, 27, miyembro ng Philippine Air Force (PAF), na isinugod sa MCI Hospital.

Ayon sa ulat ni P/SSgt. Wilfred Guevarra ng Imus City Police Station, dakong alas-12:15 ng madaling araw nang mangyari ang insidente habang minamaneho ni Arnel Joseph ang isang L300 Van na may plakang WCF 930, sakay ang kanyang ama at binabagtas ang kahabaan ng Buhay na Tubig Road, Imus City, Cavite.

Pagsapit sa palikong bahagi ng kalsada nang nawalan umano ng kontrol sa manibela si Arnel Joseph at bumangga ang kanilang sasakyan sa isang nakaparadang trailer van sa gilid ng kalsada.

Agad nalagutan ng hininga sa insidente ang senior citizen habang isinugod sa ospital ang anak nito.

Samantala, Dalawa katao ang namatay makaraang mabundol ng sasakyan sa magkahiwalay na lugar sa lalawigan ng Cavite, noong Huwebes ng gabi.

Isinugod sa Pagamutang Bayan ng Carmona ang biktimang si Rosa Esta, 38, ngunit nalagutan ng hininga habang nilalapatan ng lunas.

Agad namang nalagutan ng hininga makaraang mabundol ang biktimang kinilalang si John Miguel Cabildo, 18-anyos.

Ayon sa ulat ni P/SSgt. Charles Virtudez ng Carmona Police Station, alas-7:00 noong Huwebes ng gabi, tumatawid sa kalsada sa Governor’s Drive, Brgy. Bancal, Carmona, Cavite sina Esta at Gina Sarmiento, 34, nang mahagip ang mga ito ng bus na minamaneho ni Noel Mallorca, 60-anyos.

Kapwa isinugod ang dalawa sa ospital ngunit binawian ng buhay si Esta habang nilalapatan ng lunas.

Samantala, ayon sa ulat ni P/SSgt. Edison Fetalcurin, tumatakbo umano sa kalsada si Cabildo na tila ay nakikipagpatintero sa mga sasakyan sa

Molino-Paliparan Road, Brgy. Molino IV, Bacoor City dakong alas-11:20 ng gabi noong Huwebes.

Hinarang pa umano nito ang ilang sasakyan ngunit nabundol ng isang Daewoo bus na may plakang NDE 489 na minamaneho ni Florencio Ochavez, 44-anyos,

Agad nalagutan ng hininga sa nasabing insidente ang biktima. Inaalam pa ng pulisya kung may diperensiya sa pag-iisip si Cabildo. (SIGFRED ADSUARA)