SASABAK si 2020 Tokyo Olympics silver medallist Nesthy Petecio sa 15 hanggang 19 torneo sa 2023.
Kabilang sa lalahukan niya ang 2024 Paris Olympic Qualifier na 19th Asian Games sa Hangzhou, China.
Si Petecio ang naging guest of honor sa pagtatapos ng 2022 PSC-Batang Pinoy National Championships sa Vigan City, Ilocos Sur.
“Matindi po ang motibasyon na ipinakita sa akin ni BFF Hidilyn,” panimula ni Petecio. “Masyado po ako na-inspire sa kanya na kahit nag-gold na siya ay talagang nais pa niya patunayan na nagawa niya iyon para sa bansa natin. Iyon ang nais ko din matupad, na makakuha din ng gintong medalya sa Olympics.”
Unang lalaban si Petecio sa 2023 ASBC Asian Boxing Championships sa Thailand simula Enero 16 hanggang 27; ABAP National Championships sa Cagayan de Oro City sa Enero o Pebrero; Strandja Memorial Tournament sa Sofia, Bulgaria at International Training Camp sa Muak Lek sa Thailand sa Pebrero.
Sa Marso ay bibiyahe siya para sa Thailand Open International Tournament sa Bangkok; IBA World Women’s Boxing Championships sa New Delhi, India; at multi-nation training camp sa Antipolo bilang paghahanda sa Southeast Asian Games sa Cambodia na gaganapin sa Mayo.
Hunyo ay lalahok si Petecio sa Eindhoven Cup sa Eindhoven, The Netherlands; Hulyo sa ASBC Asian Clubs Elite Men and Women’s Boxing Championships at Elorda Cup sa Niur-Sultan, Kazakhstan.
Kasama rin siya sa international training cup bago ang Asian Games sa China, kung saan gaganapin din ang ASBC Asian Youth and Junior Boxing Championships sa Agosto 1 hanggang 14.
Gaganapin ang Asian Games sa Setyembre 23 hanggang Oktubre 8 at ang mga magwawagi ng medalya ay awtomatikong makakausad sa 2023 Paris Olympics na siyang target ni Petecio, bukod pa sa World Combat Games sa Oktubre 21 hanggang 30 sa Riyadh Saudi Arabia, at ASBC Asian Schoolboys & Girls Championships sa Oktubre 1 hanggang 7.
Kabilang din si Petecio sa international training camp for additional points sa Olympic qualifying tournaments sa Sheffield, United Kingdom o Colorado Springs sa USA. Panghuli siyang magpapartisipa sa ASBC sa China sa Disyembre. (ANN ENCARNACION)
56 
