Umarangkada na kagabi, Enero 22, ang semifinals ng 2019 World Slasher Cup (WSC) 9-Cock Invitational Derby 1 sa Smart Araneta Coliseum.

Nasa 99 entries ang nakatakdang magbakbakan para sa 3-cock semifinals simula ala-una ng hapon kahapon matapos makaalagwa sa 2-cock eliminations noong Enero 20 at 21.

Ilan sa mga top fighters na magsasagupa para sa semi-finals ay ang dating World Slasher Cup champions na sima Nene Araneta, Patrick Antonio at Frank Berin, na parehong nakapagtala ng tig 2-0 records sa elimination round.

Idedepensa ni Nene Araneta ang kanyang titulo sa nakalipas na World Slasher Cup 2 champion, si Patrick Antonio ay nais masungkit ang kanyang pang-walong WSC championship habang si Frank Berin naman target makuha ang kanyang pang-apat na kampeonato.

Maliban sa kanila, meron pang 38 entries na nakapagtala ng tig-dalawang panalo sa elimination rounds tulad ng team San Agustin, Blue Max, Romhead, Darpy, at Stingray, at marami pang iba.

Ang mga mananalo sa semi-finals ay aabante sa 4-cock pre-finals sa Enero 25 at sa grand finals sa Enero 6 kung saan hihirangin ang bagong kampeon ng World Slasher Cup.

Tinagurian bilang “Olympics of Cockfighting”, ang WSC ay ang pinakauna at pinaka-prestehiyosong sabong event sa buong mundo.  (Mateo Agapito)