ANTI-TERROR LAW, KUKUWESTYUNIN SA KORTE SUPREMA

INIHAHANDA na ni Senador Kiko Pangilinan ang petisyong ihahain sa Korte Suprema laban sa Anti-Terrorism Law.

Naniniwala ang senador na may mga probisyon sa bagong batas ang kontra sa Konstitusyon kaya’t ipauubaya nila sa mga mahistrado ang pagpapasya sa ligalisasyon nito.

Tinukoy nito ang probisyon sa warrantless arrest at ang pagpi-freeze ng assets ng isang pinaghihinalaang terorista habang hindi pa nito napapatunayan na mali ang alegasyon.

Nangangamba si Pangilinan na sa pamamagitan ng bagong batas ay magpapatuloy ang pagbabato ng iba’t ibang alegasyon laban sa oposisyon tulad ng Red October at pagsasangkot sa kanila sa sedition case.

Nanindigan din ang senador na hindi kamay na bakal ang solusyon sa mga kasalukuyang problema ng bansa tulad ng droga, terorismo at maging ng COVID 19 pandemic.

Binigyang-diin ni Pangilinan na nakita na sa mga nakalipas na taon na hindi nasolusyunan ng ‘Oplan Tokhang’ ang problema sa droga dahil wala naman anyang mga drug lord ang nasakote at hindi rin naparusahan ang mga Customs officials na nagpalusot ng bulto-bultong shabu.

Hanggang ngayon anya ay wala pang nagaganap na rehabilitasyon sa Marawi City matapos isailalim sa Martial Law ang Mindanao.

Hindi rin anya nababawasan ang kaso ng COVID 19 kahit nagpatulad ng ilang buwang lockdown ang gobyerno.

Sinabi ng mambabatas na ilan lamang ito sa mga patunay na hindi solusyon ang kamay na bakal sa mga kinakaharap na problema ng Pilipinas kundi isang komprehensibong plano para sa kinabukasan. (DANG SAMSON-GARCIA)

Read More

ATL PINABORAN NG MULTI-SECTORAL GROUP

MAGSISILBING proteksyon ng mga Pilipino at ng bansa laban sa mga terorista ang nilagdaang Anti-Terror Law ni Pangulong Rodrigo Duterte.

Ito ang pahayag ng multi-sector group na Liga Independencia Pilipinas (LIPI) kaugnay ng pagiging ganap na batas ng Anti-Terror Bill.

Sinisiguro rin ni LIPI Secretary General Jose Antonio “Ka Pep” Goitia sa publiko na mayroong mga probisyon ang batas na mangangalaga laban sa mga paglabag sa karapatang pantao.

“Malinaw namang kinikilala ng batas ang Bill of Rights sa 1987 Constitution at may mekanismong nakalatag sa potensyal na paglabag ang Anti-Terrorism Council,” aniya.

“I can assure you, the ATB is a good law– one that is swift, effective and most importantly, constitutional,” dagdag niya.

Nagpasalamat din siya kay Pangulong Rodrigo Duterte sa paglagda sa batas sa kabila ng mga oposisyon dito ng ilang sektor.

“Ito ay isang batas na magpapalaya sa atin lahat sa banta ng lahat ng uri ng terorismo dito sa bansa. Ang mga humahadlang at ayaw rito ay nung una pa man balakid at kritiko na sa magagandang plano ng administrasyong Duterte para sa totoong pagbabago at ikabubuti ng lahat at hindi ng iilang sektor lamang ng lipunan,” ani Goitia.

Payo ni Goitia sa mga tumutuligsa sa batas: “Read the bill thoroughly so they can fully understand it because there are plenty of misconceptions and misinterpretations going around in several social media platforms.”

Ang Liga Independencia Pilipinas ay koalisyon na kinabibilangan ng 48 organisasyon mula sa iba’t ibang panig ng bansa. (CESAR BARQUILLA)

Read More

COVID SAMARITAN PROGRAM, INILUNSAD PARA SA WALANG PAMBAYAD SA TESTING

PINANGUNAHAN ni Senador Richard Gordon ang paglulunsad ng Philippine Red Cross ng COVID Samaritan Program na naglalayong makalikom ng pondo para sa mga walang pambayad sa kanilang test.

Sinabi ni Gordon na dapat palawigin ang COVID testing upang matiyak na magtatagumpay ang kampanya ng bansa kasabay ng pagdiin na makatutulong dito ang programa dahil ang pondong makakalap ay gagamitin sa testing fees.

“Kailangan ma-test ang mga tao para manalo tayo laban sa COVID. This way, carriers can be separated from those who are not infected and they can be cured. At maaari na ring makabalik sa trabaho kapag na-test. Kaya sinimulan namin ang programang ito para pati ‘yung mga hindi kayang magbayad, maaaring makapagpa-test,” saad ni Gordon.

Nanguna na anya sa pagbibigay ng donasyon ang Automobile Association of the Philippines na nagkaloob ng €50,000 o P2.8 milyon gayundin ang Reckitt Benckiser Healthcare Philippines, Inc. (Lysol Philippines).

Binigyang-diin ng senador na hindi maituturing na nagkakaisa ang nasyon kung hindi mabibigyan ng tulong ang mahihirap na walang kakayahang magbayad para sa kanilang test.

May mga kahalintulad ding programa ang Red Cross tulad ng Blood Samaritan para sa mga walang maipambili ng dugo, Dialysis Samaritan para naman sa mga dialysis patients at General Good Samaritan sa iba pang may karamdaman. (DANG SAMSON-GARCIA)

Read More

MISSIONARY SITES UNAHIN – SOLONS Mga liblib na lugar lagyan ng cell towers – Reps. Nograles, Ong

KAPWA umapela sina Ang Probinsyano Partylist Rep. Ronnie Ong at Rizal Rep. Fidel Nograles sa Department of Information and Communication Technology (DITC) na paspasan ang paglalagay ng cell sites sa mga liblib na lugar na hanggang ngayon ay wala pa ring internet connectivity sa harap na rin ng bagong sistema na online learning at work from home sa panahon ng pandemic.

Ayon kay Ong, bukod sa Build Build Build program ng pamahalaan na nakatuon sa pagpapatayo ng mga tulay at kalsada ay dapat mamuhunan at tutukan din ang communication infrastucture.
“We really need good internet signal specially during the time when the new normal is really using technology to work and also learn from home. Government need to invest in technology infrastructure and not just roads and bridges. Kailangan i-bundle na talaga ito,” pahayag ni Ong.

Ayon naman kay Nograles, maaaring pondohan ng pamahalaan ang pagpapatayo ng mga cellular tower na maaaring ipaupa naman sa telecom companies, sa ganitong paraan umano ay mapabibilis ang paglalagay ng mga kinakailangang cell sites na agad nang mapakikinabangan ng publiko.

Isa ang Pilipinas sa mga bansa sa Asya na may pinakamababang cell site density, sa datos ng TowerXchange, isang informal network ng mga advisors sa market tower industry sa buong mundo, ang user-per-cell site density sa Pilipinas ay 4,036, ito ay base sa 18,000 total cell sites para sa 67 million internet users, malayong-malayo ito sa kalapit na bansang India na 312 lamang ang user-per-site density dahil sa may 1.5M na cell sites; ang Indonesia ay may 91,700 cell sites para sa kanilang132M internet user o user-per-site density na 1,446 habang ang China ay may 1.95 million cell sites para sa 751 million internet users o may user-per-site density na 384 samantalang ang Vietnam ay may 70,000 cell sites para sa 64 million internet users o user-per-site density na 914.
Sa Cotabato City sa Mindanao halimbawa na may 246,700 Globe active customers ay naghahati-hati lamang sa 13 cell sites kaya hirap sa signal habang sa ibang malalayong lugar ay hindi pa abot ng internet connection.

Aminado ang mga telecom companies na isa sa balakid kung bakit natatagalan ang paglalagay ng mga cellular tower ay dahil na rin sa 25 ibat ibang permits na kailangang isumite na karaniwang inaabot ng 8 buwan pataas bago makumpleto, bukod pa umano rito ang iba pang requirements na itinatakda ng ilang Local Government Units(LGUs), exclusive subdivisions at Housing and Land Use Regulatory Board (HLURB).

Samantala, aminado naman ang DICT na ang maraming requirements ang nagpapabagal sa pagpapatayo ng cell sites kaya naman plano nilang bawasan ng 50% ang “redundant or duplicitous permitting” sa konstruksyon ng telco towers.

Sinabi ni DICT Assistant Secretary Emmanuel Caintic na nakikipag-ugnayan na sila sa Anti-Red Tape Authority at iba pang government agencies para ma-streamlined ang permitting requirements at procedures.

Layon din ng gagawing mas magaan na construction requirements na palakasin ang common tower program ng DICT, sa ilalim ng programa ay papayagan ang independent tower companies na magtayo ng kanilang sariling sites na s-ya namang ipapaupa sa mga telco operator gaya ng PLDT Inc. at Globe Telecom.

Noong wala pang common tower program ang DICT ay ang mga telco companies lamang ang siyang pinapayagan na magtayo ng cell sites kaya naman kalimitang nakaliligtaan ang mga liblib na lugar at nakasentro lamang ang mga cell sites sa mga urban areas kung saan may mataas na user demand.

Nasa 50,000 towers ang kailangan para mapalakas ang mobile connectivity sa buong bansa. Una nang sinabi ng telco companies na aabutin ng 10 taon bago ito mapatupad subalit sa oras na buksan ng DICT sa independent player ang pagpapatayo ng cell tower ay inaasahang sa loob lamang ng 3 hanggang 5 taon ay mapalalakas na ang internet connection sa bansa partikular sa ilang lugar sa Visayas at Mindanao.

Ang guidelines para sa common tower policy ay nakatakdang ipalabas ng DICT sa susunod na buwan.

Sa ngayon ang US-based company na American Tower Corp., isang global operator ang nagpahayag ng intensyon na mag-invest sa pagpapatayo ng cellular tower sa Pilipinas subalit sinabi ng DICT na bukas din ang programa sa iba pang mga tower operator.

Positibo naman ang DICT na sa oras na madagdagan ang cell sites ay bubuti na ang internet connection at mapabababa pa ang singil. (ABBY MENDOZA)

Read More

Nadagdagan muli ng 2 COVID DEATH TOLL SA QC: 237

NAKAPAGTALA ng dalawang bagong kaso ng pagkamatay sa COVID-19 sa Quezon City.

Ayon sa report ng Department of Health (DOH) hanggang nitong Hulyo 3, ang lungsod ay nagkaroon ng dalawang bagong kaso ng pagkamatay sa COVID-19 na nagdala ng kabuuang bilang ng mga namatay sa 237.

Base pa sa report ng DOH hanggang nitong Hulyo 3, ang kabuuang bilang ng kumpirmadong kaso ng COVID-19 sa Quezon City ay umabot na sa 3,622.

Ang kabuuang bilang ng kumpirmadong kasong may kumpletong addresses sa nasabing siyudad ay kasalukuyan nasa 3,545.

Ang kabuuang bilang ng validated cases ng QC Epidemiology and Surveillance Unit at District Health Offices ay nasa 3, 518.

May naitalang dagdag na 111 cases sa naiulat  na 3,407 noong Huwebes na nagresulta ng kabuuang bilang ng 3,518 validated cases.

Nasa 1,200 ang active COVID-19 cases sa siyudad.

Kaugnay nito, ang QC ay may naitalang 78 bagong recoveries na nagdala ng kabuuang bilang ng mga gumaling sa 2,081. (JOEL O. AMONGO)

Read More

MOST WANTED SA MAYNILA NAARESTO SA CAINTA

NADAKIP ng mga tauhan ng Manila Police District sa Cainta, Rizal noong Biyernes ng tanghali ang isang 34-anyos na factory worker na suspek sa panggagahasa.

Kinilala ang suspek na si Jeffrey Garcia y Concepcion, ng Barangay San Juan, Valley Golf, Cainta, Rizal.

Batay sa ulat ni P/Capt. Manuel Calleja, hepe ng Intelligence and Warrant Section ng MPD – Jose Abad Santos Police Station 7, bandang 12:30 ng tanghali nang makipagkoordinasyon sila sa Cainta Police District.

Bitbit ang arrest warrant na inisyu ni Judge Ma. Celestina Mangrobang ng Manila Regional Trial Court, Branch 38, pinuntahan ng mga awtoridad ang kinaroroonan ng suspek.

Ngunit namataan ng suspek ang mga pulis kaya tumakbo patungo sa loob ng kanilang bahay.

Naging mahinahon naman ang suspek nang makorner sa loob ng bahay at kusang loob na sumama sa mga operatiba ng MPD. Ang suspek na may kasong rape ay number 1 sa listahan ng wanted personalities sa MPD. (RENE CRISOSTOMO)

Read More

TULAK, KASABWAT TIMBOG SA BUY-BUST

MAKARAAN ang surveillance operation, nahulog sa kamay ng batas isang drug suspect na kabilang sa drug watchlist ng pulisya, at kasabwat nito sa buy-bust operation sa Parola Compound, Binondo, Manila noong Biyernes ng gabi.

Kinilala ng mga awtoridad ang mga suspek na sina Joaquin Nacional y Valera, 26, ng Gate 46, Area C, Parola Compound, Brgy. 275 sakop ng Binondo.

Samantala, timbog din ang umano’y kasabwat nitong si Jerry Boy Dosal, 19, binata, ng Gate 54, ng nasabi ring lugar.

Ayon sa ulat, bumili ng P500 halaga ng shabu ang poseur buyer at makaraan ang transaksyon ay inaresto ang mga suspek na nakumpiskahan ng ilegal na droga na tinatayang P190,000 ang halaga.

Ang mga suspek ay sinampahan ng kasong paglabag sa Comprehensive Dangerous Drugs Act of 2002). (RENE CRISOSTOMO)

Read More

SIDECAR BOY GRINIPUHAN SA KALSADA

AGAD namatay ang isang 37-anyos na sidecar boy makaraang pagsasaksakin sa gitna ng kalsada sa Tondo, Manila nitong Sabado ng madaling araw.

Kinilala ang biktimang si Reynaldo Macatangay y Abayan, kaanib ng Commando gang, pedicab driver, ng Building 113, Sambahayan Moriones St., Tondo.

Batay sa isinumiteng ulat ni Det. Jansen Rey San Pedro, ng Manila Police District-Homicide Section, nangyari ang insidente bandang alas-3:30 ng madaling araw noong Hulyo 4 sa panulukan ng Carlos P. Garcia St. at Moriones St. sakop ng Barangay 123, Zone 9 sa Tondo, Ayon sa ilang testigo, nakarinig sila ng malakas na sigaw ng isang lalaki at nang sila ay lumabas ay nakita nila ang duguang biktima habang nakahandusay sa kalsada.

Natagpuan ng mga pulis sa bulsa ng biktima ang isang sachet ng umano’y shabu.

Blangko pa ang pulisya hinggil sa pagkakakilanlan ng suspek at sa posibleng motibo sa krimen. (RENE CRISOSTOMO)

Read More

Kung mananatiling dugyot RESIDENTE SA ESTERO SA MAYNILA, IDEDEMOLIS

UMAPELA si Manila Mayor Francisco “Isko Moreno” Domagoso sa mga pamilyang nakatira sa iskwater na kalimutan na ang ugaling dugyot at ayusin ang pagtatapon ng mga basura at huwag ihahagis sa ilog at iba pang waterways.

“Hindi porke squatter, kailangan ding maging dugyot, baguhin natin ang maling nakagawian. Inuunawa kayo ng pamahalaan pero ‘wag sana n’yo hintayin na isang araw naubos na lang ang pasensiya ng gobyerno,” pahayag ng alkalde.

Sa kabila na may katuwang ang lokal na pamahalaan sa paglilinis ng mga kanal sa pamamagitan ng estero rangers, dapat naman aniyng makipag- kooperasyon ang ibang mga residente.

“Tuloy-tuloy kami maglinis, tuloy-tuloy din kayo magtapon. Hindi ba nangangawit ang kili-kili ninyo sa katatapon ng basura? Huwag naman. Baka mamaya mapilitan kaming gibain namin kayo diyan,” pahayag ng alkalde.

“Hindi ho ba mas masaklap ;yun? Halimbawa, napagod na lang ang gobyerno na unawain kayo, unang-una ilegal po kayo diyan,” pahayag pa ng alkalde.

“Mga kababayan naman. Nasa ilog na nga kayo, squatter na nga kayo, kailangan pa bang maging dugyot din ang pamumuhay ninyo? Tama na ‘yung sabihan tayong squatter. Squatter din ako pero ‘di naman kailangang maging squatter din ang pag-uugali natin. Ganun na nga katayuan natin, ganun pa rin ba ang gusto nating kapaligiran,” dagdag pa ng alkalde. (RENE CRISOSTOMO)

Read More