NAGTAPOS sa ika-22 puwesto ng women’s short program segment ng 2021 Nebelhorn Trophy si Filipina-American figure skater Sofia Frank, Biyernes ng madaling araw (Manila time) sa Oberstdorf, Germany.
Nakapagtala si Frank ng 47.65 points sa huling qualifying tournament para sa 2022 Beijing Winter Games.
Ito ang international debut ng 15-year-old figure skater at unang beses din na nirepresenta ang bansa sa isang major competition.
Bumida sa women’s short program segment, na sinalihan ng 37 skaters, si Alysa Liu ng Amerika (70.86 pts), pumangalawa si Swiss Alexia Paganini (65.65 pts) at pangatlo si Viktoriia Safonova ng Belarus (62.02 pts).
Sunod na sasalang si Frank sa women’s free skating event, Sabado ng gabi (Manila time).
Sa men’s short program, pumuwesto sa ika-16 si Philippine-bet Edrian Celestino na nakapagtala ng 64.32 puntos. (ANN ENCARNACION)
227 
