MAYO 2022 na ang bagong playdate ng 21st Asian Senior Women’s Volleyball Championship sa Pampanga.
Alinsunod ito sa suhestiyon ng Asian Volleyball Confederation’s (AVC), ayon sa Philippine National Volleyball Federation.
Orihinal na nakaiskedyul ang continental tournament, na 2022 FIVB Volleyball Women’s World Championship qualifier, Agosto 29 hanggang Setyembre 5 sa Pampanga.
Ngunit dahil sa pagtaas ng COVID-19 cases sa Pilipinas at iba pang mga bansa sa Asya ay nakansela ito.
Sumulat mismo si AVC President Rita Subowo kay PNVF President Ramon “Tats” Suzara para ilutang ang bagong schedule sa naturang continental tourney, ayon sa spin.ph.
Sa AVC Board of Administration online meeting noong Martes, hiniling ng mga ito sa FIVB na isagawa ang Asian championship sa Mayo “in order for the women’s teams to obtain FIVB World Ranking points from the 2021 continental tournament like other confederations.”
Samantala, inaprubahan na ng Philippine Sports Commission ang hirit ng PNVF na 20 atleta para sa men at women volleyball teams at eight players para sa bawat men at women beach volleyball squads.
Pumayag din ang PSC sa tig-apat na coaches para sa bawat men at women volleyball teams at tig-dalawang coaches para sa men at women beach volleyball squads.
238 
