LAGLAG ang limang miyembro ng isang hinihinalang drug group, sa ikinasang anti-narcotics operation ng mga ahente ng Philippine Drug Enforcement Agency sa ilalim ng kanilang Case Operation Plan (COPLAN) “Molecules”, sa Barangay San Juan, Taytay, Rizal.

Ayon sa isinumiteng ulat sa tanggapan ni PDEA Director General, Undersecretary isagani Nerez, humigit-kumulang sa kalahating kilo ng hinihinalang shabu ang nasamsam ng kanyang mga tauhan at nadakip ang limang drug personalities.

Pinangunahan ng PDEA Rizal Provincial Office ang nasabing anti-illegal drug operation katuwang ang PDEA Laguna at Batangas Provincial Offices, PDEA Seaport Interdiction Unit-Quezon, PNP Regional Intelligence Unit 4A-Provincial Intelligence Team, Taytay Municipal Police Station at Rizal Police Provincial Office-Provincial Intelligence Unit.

Ayon sa ulat ng PDEA Rizal Provincial Office kay USEC. Nerez at kay Deputy Director General for Operation Renato Gumban, kinilala ang mga suspek na sina alyas “Anton”, 26, itinuturong lider ng grupo, siyang pangunahing target sa buy bust operation; “Jammer”, 25; “Jassim”, 26; “Datu”, 39, at “Shaina”, 26, habang target ng manhunt operation ang isa pang kasamahan nila na si alyas “Baidido”.

Nasamsam sa operasyon ang humigit-kumulang 500 gramo ng hinihinalang shabu na nagkakahalaga ng P3,400,000.00 at ang ginamit na buy-bust money.

Nahaharap ang mga suspek sa kasong paglabag sa Section 5 kaugnay ng Section 26 parag b (Conspiracy to Sell Dangerous Drugs) Article II ng Republic Act 9165 o ang Comprehensive Dangerous Drugs Act of 2002.

(JESSE RUIZ)