NAKUMPISKAHAN ng baril at patalim ang tatlong indibidwal na naaktuhan habang nagsusugal sa isang eskinita sa Gate 18, Parola Compound, Barangay 20, Tondo, Manila nitong Miyerkoles ng madaling araw.

Kinilala ang mga arestado na sina “Abraham”, 32, helper; “Jeson”, 23, porter, at “Jackson”, 29-anyos.

Base sa ulat ni Police Staff Sergeant Charmaine Duenas, ng Police Community Precinct 3, sakop ng Manila Police District- Delpan Police Station 12, bandang alas-12:15 ng madaling araw nang dambahin ng mga awtoridad ang tatlo habang nagsusugal ng cara y cruz sa nasabing lugar.

Nabatid mula kay Police Captain Marvin Manalo, hepe ng PCP 3, nagpapatupad ang mga awtoridad ng Oplan Galugad at Simultaneous Anti-Criminality Law Enforcement Operation (SACLEO), nang maaktuhan ang mga suspek na nagsusugal.

Nakumpiskahan ang mga suspek ng isang baril na may dalawang bala, at dalawang patalim.

(RENE CRISOSTOMO)