(NI ROSE PULGAR)

NASAWI ang dalawang Pinoy seafarers matapos madamay ang mga ito sa gang war sa isang bar sa Mexico nitong Martes.

Pansamantalang hindi muna pinangalanan ng Department of Foreign Affairs (DFA) ang mga biktima.

Ayon sa embahada ng Pilipinas sa Mexico, naganap ang insidente nitong Agosto 27 sa Port of Coatzacoalcos, Veracruz, Mexico.

Base sa ulat ni Philippine Ambassador to Mexico Demetrio R. Tuazon sa DFA, nagkaroon umano ng riot sa pagitan ng magkaribal na gang.

Dahil sa gang war ay nadamay ang dalawang Pinoy seafarers  na naroon sa lugar.

Ito ay base sa inilabas na pahayag ni State Governor of Veracruz Cuitlahuac Garcia sa social media.

Pinoproseso na ng DFA ang repatriation o pagpapauwi sa mga bangkay ng mga biktima sa Pilipinas at nagpahatid rin ng pakikiramay ang ahensiya sa mga pamilyang naulila ng mga ito.