NAHARANG ng Bureau of Immigration (BI) officials sa Ninoy Aquino International Airport (NAIA) noong Martes ang dalawang Filipina na ilegal na na-recruit para magtrabaho sa bansang Qatar.
Sa report kay BI Commissioner Jaime Morente ni Travel Control and Enforcement Unit chief Ma. Timotea Barizo, ang dalawang pasahero ay pansamantalang hindi muna binanggit ang mga pangalan para sa kanilang proteskyon.
Ang mga ito ay naharang sa departure area ng NAIA Terminal 3 kung saan ay tangkang sumakay sa flight via Qatar Airways.
Ibinahagi ni Barizo, ang primary inspection officers ang nagsusuri sa mga dokumento ng lahat ng overseas Filipino workers (OFWs) bago maklaro ang mga ito para sa kanilang departure.
“The quick eye of our immigration officers in the frontlines saw that there was reason to suspect the duo, upon noticing that their Overseas Employment Certificates (OECs) are not encoded in our linked database with the Philippine Overseas Employment Administration (POEA),” dagdag pa ni Barizo.
Bilang bahagi ng protocol, ang dalawa ay ipinasa na sa terminal’s POEA Labor Assistance Center (LAC) para sa beripikasyon ng kanilang mga dokumento.
Pagkaraan ay pinabalik ang mga ito para ipresenta ang kanilang validated slip ngunit nadiskubreng palsipikado ito.
Sa isinagawang pagtatanong ng BI’s TCEU, ang mga biktima ay umamin na ang kanilang OEC validation forms ay ibibigay lamang ng kanilang handler malapit sa airport’s exit, kapalit ang P35,000 bawat isa.
Ayon pa kay Barizo, ang palsipikadong OECs ay walang saysay dahil mayroon silang integrated system sa POEA para ma-check kung lahat ng paalis na OFWs ay tama ang kanilang mga dokumento.
“Securing the proper documents and clearances from the POEA is crucial for all aspiring OFWs to protect them from abusive companies and employers,” paalala pa ni Barizo.
Pinuri naman ni Morente ang pagsisikap ng immigration officers laban sa human trafficking, subalit nagpahayag naman ng pagkadismaya sa trafficking at illegal recruitment syndicates.
“I commend the efforts of our immigration frontliners who, in spite of pandemic woes, continue to show vigilance in their work as public servants,” aniya. “This should now serve as a warning to syndicates who may have falsely believed that the bureau has become lenient in screening documents during the pandemic,” dagdag pa niya.
Ang dalawang biktima ay nai-turned-over na sa Inter-Agency Council Against Trafficking (IACAT) para sa kaukulang imbestigasyon. (JOEL O. AMONGO)
381 
