NAGKAINITAN sina Senate President Vicente ‘Tito’ Sotto III at Senador Cynthia Villar kaugnay usapin ng personal na pagdalo sa sesyon ng Senado.

Ito ay nang pagbotohan ng mga senador ang committee report ni Senador Ronald ‘Bato’ Dela Rosa hinggil sa panukala para sa modernisasyon ng Bureau of Fire Protection.

Kinuwestyon ng ilang senador ang laman ng committee report nang maisama pa rin ang probisyon hinggil sa pag-aarmas sa mga bumbero na nauna nang tinanggal sa Senate version ng panukala.

Sa botong, 11-8-3, nagdesisyon ang Senado na huwag tanggapin ang report at ibalik ito sa bicameral committee.

Kinapos ng isang boto si Dela Rosa upang mailusot ang report dahil hindi nakapasok sa attendance at sa botohan si Senador Bong Go at nang makapasok ito ay naideklara na ang resulta ng botohan.

Kinuwestyon naman ito ni Villar at iginiit na may problema lamang sa internet connection si Go na sinagot naman ni Sotto na kaya dapat mas makabubuting physically present ang mga senador.

“You know, Mr. Senate President. They don’t allow seniors to go out in the home. In fact, makukuwestyon kayong mga seniors na andyan. Kapag sinasabi mo palagi na dapat andito kayo, you should consider that we cannot get out. You know kayo, senior nakakalabas kayo you take the risk of being question because under the protocol the seniors cannot go out of their homes,” saad ni Villar.

Sinabi naman ni Sotto na ang kanyang tinutukoy ay si Go at hindi si Villar.

“You always say that you should be here. How can we be there, the seniors, we are not allow to get out of our home. Maswerte ka na senior ka, andyan ka pinapayagan ka. Pero kung malagay tayo sa diyaryo na mga senador tayo dahil mga senador tayo, lumalabas tayo sa bahay natin, di ba panget din tignan yun?” diin pa ni Villar.

“I take exception to what you are saying Senator Villar because you should listen to what I am saying. I was pertaining to Senator Go. If you are not online, you could have been here. Now, if you are not physically present therefore you are not online, therefore you are not present. Ang ibig kong sabihin kung offline ka, wala kang koneksyon, wala kang internet, mas mabuting andito ka. Kung physically present ka, mabibilang ka pero dahil wala kang koneksyon, wala kang internet hindi ka mabibilang,” gigil namang paliwanag ni Sotto.

“I was not pertaining to the seniors. As a matter of fact, Senator Bong Go is not a senior. He should be here. I take exception to what you are saying baka akala mo pinariringgan ko kayo. Hindi ko kayo pinariringgan, you don’t have to be here if you don’t want to. You are seniors. I was pertaining to Senator Bong Go and the vote,” pagpapatuloy pa ni Sotto sabay ng deklarasyon ng suspensyon ng sesyon. (DANG SAMSON-GARCIA)