CAVITE – Dinakip ang tatlong umano’y tulak ng ilegal na droga na nasa listahan ng high value individuals (HVIs) ng pulisya, makaraang makumpiskahan ng mahigit kalahating milyong pisong halaga ng shabu sa isinagawang operasyon ng mga awtoridad sa Dasmariñas City noong Martes ng hapon.

Kinilala ang mga inaresto na sina alyas “Edzel”, alyas “Rey” at alyas “Brendo”, pawang nasa hustong edad.

Ayon sa ulat, dakong alas-4:00 ng hapon nang magsagawa ng buy-bust operation ang mga operatiba ng Provincial Drug Enforcement Unit (PDEU), Cavite Police Provincial Office (PPO) at Provincial Intelligence Unit (PIU) sa Brgy. Paliparan 1, Dasmariñas City na nagresulta sa pagkakaaresto sa mga suspek na nakumpiskahan ng 75 gramo ng hinihinalang shabu na P510,000 ang street value.

Kabilang din sa nakumpiska sa mga suspek ang buy-bust money, cellphone, at isang Toyota Vios XLE na may plakang NEL 5316.

(SIGFRED ADSUARA)