LUCENA CITY – Patay ang isang umano’y drug personality nang atakihin sa puso matapos arestuhin sa isinagawang anti-illegal drug buy-bust operation ng mga tauhan ng PDEA at Quezon PNP sa Barangay 5 sa lungsod na ito, noong Lunes ng gabi.

Ayon sa report ng Police Regional Office 4A (PRO 4A), mag-aalas-otso ng gabi, isinagawa ng mga tauhan ng Intel/DEU ng Lucena Police Station, kasama ang iba pang mga operatiba mula sa PDEA 4A, Quezon Maritime Police Station, CIDG Quezon, at RIU 4A Quezon PIT, ang buy-bust operation na nagresulta sa pagkakadakip sa suspek na nakatala sa PNP drug watchlist.

Nakumpiska sa suspek ang 4 sachet ng hinihinalang shabu na tinatayang P1,836 ang street value.

Ngunit habang inaaresto, bigla na lamang nag-collapse ang suspek at nawalan ng malay. Agad itong isinugod sa ospital subalit idineklarang dead on arrival ng doktor dahil sa cardiac arrest.

(NILOU DEL CARMEN)