Ni ANN ENCARNACION
GAYA sa unang laban niya, hindi na pinatapos ang round 1 ni Philippines’ Eumir Felix Marcial nang pabagsakin din ang nakatapat na si Arman Darchinyan ng Armenia sa Olympic quarterfinals ng men’s middleweight (69-75kg) boxing competition sa Kokugikan Arena kahapon ng tanghali.
Inabot lang si Marcial ng 2:11 minuto sa unang round ng q’finals match up kontra Darchinyan, para umusad sa semifinal round at matiyak ang bronze medal.
Pinatamaan ng 25-anyos mula Zamboanga City ang katawan ng kalaban bago isinagawa ang tatlong magkakasunod na suntok sa ulo nito para sa standing eight count.
Matapos ito ay ipinagpatuloy ng Pinoy ang pag-atake at muling nagpaulan ng combination punches bago ang right cross sa panga ni Darchinyan na nagpabagsak dito at nagtulak sa coaches nito para umakyat sa ring at ipatigil ang laban.
“It was not planned. We are ready for a long haul. The knock-out came, so we are very happy,” sabi ni Association of Boxing Alliances in the Philippines (ABAP) secretary general Ed Picson. “It was a product of preparation. He (Eumir) is back in his killer form.”
Noong Huwebes ng tanghali ay nagtala si Marcial ng Referee Stopped Contest (RSC) sa huling 19 segundo kontra Younes Nemouchi ng Algeria sa Round of 16.
Nakakuha siya ng bye dahil sa top 4 ranking papasok sa Tokyo Games kaya’t hindi na dumaan sa Round of 32 si Marcial, na nag-qualify sa Olympics nang mag-gold sa 2020 Asia and Oceania Qualifying Tournament.
Makakalaban ni Marcial sa semi-final round si Oleksandr Khyzhniak ng Ukraine sa Agosto 5, 2:03 ng hapon.
127 
