INANUNSYO ng mga pamahalaang lungsod ng Parañaque, Pasay, Muntinlupa at Las Piñas ang pagsususpinde ng klase sa lahat ng antas sa mga pampubliko at pribadong paaralan nitong Agosto 22 dahil sa masamang panahon.
Ipinag-utos ni Parañaque City Mayor Edwin Olivarez ang suspensiyon ng mga klase sa hapon sa mga pampubliko at pribadong paaralan sa rekomendasyon ng Parañaque City Disaster Risk Reduction and Management Office.
Pinayuhan din ni Olivarez ang mga awtoridad ng paaralan na ipatupad ang maagang dismissal ng mga klase sa umaga para sa kaligtasan ng mga mag-aaral.
Sa Pasay City, ipinag-utos din ni Mayor Emi Calixto-Rubiano ang suspensiyon ng klase sa lahat ng pampubliko at pribadong paaralan simula sa tanghali.
Iniutos ni Rubiano ang suspensyon ng mga klase sa rekomendasyon ng City Disaster Risk Reduction and Management Office.
Pinayuhan din niya ang mga awtoridad ng paaralan na lumipat sa modular na pag-aaral depende sa mga kakayahan ng paaralan upang ipagpatuloy ang kanilang aktibidad.
Sa Las Piñas, ipinag-utos ni Mayor April Aguilar ang suspensyon ng klase dahil sa matinding pag-ulan din na nararanasan sa lungsod.
Sinuspinde rin ni Mayor Ruffy Biazon ang face-to-face classes sa lahat ng antas sa pampubliko at pribadong paaralan sa Muntinlupa nitong Agosto 22 dahil sa masamang panahon.
“Batay sa forecast na pinalabas ng PAGASA ngayong 5:05 AM at rainfall forecast ng DDRMO, face to face classes are suspended today in Muntinlupa City, August 22, 2025, all levels, public and private,” anunsyo ni Biazon.
(CHAI JULIAN)
99 
