DEAD ON ARRIVAL sa pagamutan ang dating broadsheet reporter matapos pagtatagain ng kanyang kainuman nitong Miyerkoles ng umaga sa Rodriguez, Rizal.

Nakilala ang biktima na si Norberto “Bert” Javier, 68-anyos, tanod ng Brgy. San Rafael sa nasabing bayan at dating reporter ng Manila Bulletin.

Sa ulat, dakong alas-04:40 ng umaga habang natutulog ang biktima sa tindahan sa Sitio Wawa sa nasabing barangay ay inatake ito ng suspek na si Victor Enavia, 33-anyos at pinagtataga.

Nagawa pang maisugod ang biktima sa Ynares Hospital sa Rodriguez subalit idineklarang dead on arrival ni Dr. Kim Pascual.

Napag-alaman na ang tindahan na pinangyarihan ng krimen ay ginagawang tambayan ng mga tanod.

Sa follow-up operation ng Rodriguez PNP ay kaagad naaresto ang suspek at nang busisiin ang kanyang cellphone ay nakita na kinunan nito ng video ang krimen. (TOTO NABAJA)