MAKARAAN ang tatlong taong pagliban, balik-kumpetisyon si two-time Winter Olympian Michael Martinez.
Nakatakdang lumaban ang Pinoy figure skater sa 2021 Finlandia Trophy sa Espoo, Finland na gaganapin sa Oktubre 8-10.
“Comeback competition – Let’s go!” post ng 24-anyos na si Martinez sa kanyang Facebook page kung saan ipinakita pa niya ang competition ID.
Huling sumabak si Martinez noong 2018 Winter Olympics sa Pyeongchang, South Korea kung saan siya tumapos sa 28th place sa men’s short program.
Target sana niya na mag-qualify sa 2022 Beijing Winter Olympics, ngunit hindi siya nakasama sa huling qualifier na 2021 Nebelhorn Trophy dahil kailangan ay ‘fully recovered’ siya mula sa kanyang injuries.
Samantala, maliban kay Martinez, lalahok rin sa 2021 Finlandia Trophy sina Filipina-American figure skater Sofia Frank at 2019 Southeast Asian Games silver medalist Christopher Caluza. (ANN ENCARNACION)
146 
