ARESTADO ang tatlo katao sa magkahiwalay na  operasyon ng mga tauhan ng Las Piñas City Police, nitong Lunes ng hapon hanggang gabi.

Unang nasakote sa buy-bust operation dakong alas-5:30 ng hapon ang suspek na si Eric Davin sa Rizal St., Brgy. CAA, Las Piñas City.

Nakuha sa suspek ang dalawang piraso ng plastic sachet na may limang gramo ng hinihinalang shabu na P34,000 ang street value, at P200 marked money.

Ang suspek ay nakakulong na sa Station Custodial Facility  ng lungsod at sasampahan ng kasong paglabag sa RA 9165 o Dangerous Drugs Act of 2002.

Samantala, binalewala ng dalawang Indian national ang City Ordinance 27-28 na nagtatakda sa pagbabawal sa pag-inom ng alak sa kasada.

Sa Oplan Galugad ng mga pulis sa Verdant Acres Subdivision, naaktuhan ang mga Indian national na sina Singh Ranjeet at Harmail Singh, kapwa buy and sale businessman, habang tumutungga ng beer sa panulukan ng Macopa St. at Mabolo St. sa Pamplona Tres, Las Piñas City.

Apat na bote ng beer ang nakuha sa dalawa  na matapos isailalim ng medical examination sa Las Piñas City General Hospital, ay ikinulong sa SIDMS LPC. (KIKO CUETO)