PANSAMANTALANG ipinasara ng Bureau of Customs (BOC) ang isang gas station sa Valenzuela City matapos matuklasan na ilan sa mga tangke nito ay naglalaman ng unmarked fuel na aabot sa halagang P3.1 milyon.

Sinabi ni Customs Commissioner Bienvenido Rubio, ang tatlo sa apat nitong tangke sa Roden Refilling Fas Station sa Barangay Ugong ay nabigo sa fuel mark test na isinagawan ng Customs Intelligence and Investigation Service-Manila International Container Port (CIIS-MICP) at Enforcement Group-Fuel Marking agents noong Huwebes.

Samantala, iniulat ni BOC-CIIS Director Verne Enciso, nagtungo ang mga ahente sa gas station upang magsagawa ng chain of custody activities kabilang ang marking, sampling, at testing ng mga gasoline mula sa source, carrier vehicle/vessel at destination retail/fuel stations o imbakan.

Ipinaliwanag ng opisyal ng BOC na ang unmarked fuel o kakulangan sa opisyal na fuel marker ay nagpapahiwatig ng kawalan ng pagbabayad ng mga kinakailangang tungkulin at buwis.

Ang mga tangke ng gasoline 1 hanggang 3 ng istasyon na nabigo sa fuel mark testing ay naglalaman ng 19,196 litro ng premium gasoline, 18,680 litro ng unleaded gasoline, at 19,098 litro ng pinaghalong diesel ,ayon sa pagkakabanggit.

Sa apat na nasubok na tangke, tanging ang ikaapat na tangke na mayroong 4,000 litro ng pinaghalo na diesel ang pumasa sa pagsusulit sa pagmamarka ng gasoline.

Kasunod ng mga nabigong marka sa mga unang pagsusuri, ang mga sample ng gasolina ay isasailalim sa confirmatory testing ng isang pribadong laboratory. (JOCELYN DOMENDEN)