(CYRILL QUILO)
MAHIGPIT na ang pagbabantay sa mga border sa paligid ng National Capital Region (NCR) plus simula alas-12 ng hatinggabi ng Linggo, Agosto 1.
Bagaman sa isang linggo pa magsisimula ang muling pagsasailalim sa enhanced community quarantine (ECQ) ng Metro Manila ay naglatag na ng border control points dito at sa karatig lalawigan ng Rizal, Laguna, Bulacan at Cavite.
Nabatid na iniutos ni Department of Interior and Local Government (DILG) Secretary Eduardo Año kay JTF Covid Shield Commander at PNP Deputy Chief for Operations, Lt. Gen. Israel
Dickson, na paganahin na ang Quarantine Control Points (QCPs) o checkpoints sa mga lagusan sa bawat boundary ng NCR Plus.
Ito ay upang matiyak na tanging Authorized Persons Outside of Residence (APOR) ang tatawid sa mga QCP o checkpoints.
Paalala ng kalihim, dapat hingan ng IATF ID o company ID ang mga bumibiyahe.
“The implementation of strict border controls in the NCR plus areas is critical to stopping the spread of the Delta variant,” pahayag ni Ano.
Dagdag pa nito, ang sinomang lalabag ay mahaharap sa kaparusahan sa ilalim ng Section 9 ng RA 11332 (An Act Providing Policies and Prescribing Procedures on Surveillance and Response to Notifiable Diseases, Epidemics, and Health Events of Public Health Concern).
Pulis sa NCR
daragdagan
Kaugnay nito, magtatalaga ng karagdagang police personnel ang Philippine National Police (PNP) sa kalakhang Maynila.
Kabilang sa mahigpit na babantayan ang iba’t ibang vaccination sites, ayuda centers, palengke at supermarkets sa panahon na umiiral ang ECQ.
Ayon kay Sec. Año, layon nito na matiyak ang kaayusan sa mga nasabing lugar lalo na ang pagsunod sa istriktong minimum public health standard.
Aniya, may dedicated checkpoints para sa cargo trucks na maghahatid ng essential goods sa Metro Manila.
99
