May kasabihan sa larangan ng politika na “politics is always local” na ang ibig sabihin ay mas mahalaga para sa mga politiko sa nasyunal ang lokal na posisyon dahil ito ang nagsisilbing base o balwarte nila sa magulong mundo ng politika.

Mismong si Pangulong Rodrigo Duterte ay matagal nang lokal na opisyal bilang mayor, vice mayor at kongresista ng Davao City na naging tuntungan niya para maging presidente ng Republika.

Pero bagama’t pala­ging lokal mag-isip ang mga politiko, hindi maikakaila na palaging personal din ang politika na ang ibig sabihin ay kung ano mang magdesisyon sa politika ay palaging nakabase sa personal na kagustuhan ng mga politiko.

Nakakalungkot ngang isipin na dahil sa politika ay nagkakagalit ang mga mag-ama gaya nang nangyari sa mga Villafuerte ng Camarines Sur; Marcos at Keon sa Ilocos Norte at mga Ejercito at Estrada sa Lungsod ng San Juan.

Pinakamatindi na sigurong bangayan ng magkakapamilya sa politika ang nagaganap na hidwaan sa pagitan ni kasalukuyang Makati City Mayor Abigail Binay at ang kanyang nakababatang kapatid at dating mayor na si Junjun Binay na siyang pinakamahigpit niyang kalaban bilang punong lungsod.

Hindi na rin naitago ang malalang hidwaan sa pagitan nina Mayor Abby at Junjun Binay at sa candidate’s forum na sponsored ng Parish Pastoral Council for Responsible Voting (PPCRV) sa simbahan ng San Ildefonso Parish nangyari ang bastusan ng magkapatid.

Maihahalintulad ang awayang Abby-Junjun sa awayan ng mga anak ni King David sa Old Testament kung saan humantong sa patayan at walang nagawa ang hari sa naturang sitwasyon na kagaya ng nangyayari sa Makati City kung saan walang magawa si dating Vice President Jojo Binay.

Kung tama ang mga ulat sa pahayagan, pinagbintangan ni Mayor Abby si Junjun na siyang nagkakalat ng balita na drug addict umano ang asawa nitong si Makati Rep. Luis Campos na tumatakbo sa ikalawang distrito.

Pinasubalian naman ito ni Junjun Binay at sinabing siya rin ay namatayan ng tagasuporta sa katauhan ni Monaliza “Monette” Bernardo na binaril ng riding-in-tandem sa harap ng kanyang bahay sa Barangay Olympia noong Marso 21.

Lumilitaw na ang asawa ni Mayor Abby na si Rep. Campos ang puno’t dulo ng hidwaan ng alkalde at mi­yembro ng kanyang pamilya at nagsimula ito nang magsimulang maging magsyota ang ngayo’y mag-asawa, ayon na rin kay Senator Nancy Binay na siyang pinakamatanda sa magkakapatid.

Paliwanag ni Sen. Nancy: ”Our personal rift started when she (Abby) started dating iyung asawa n’ya ngayon. Sabi ko nga, ano iyung pinag-awayan nila last Saturday? Siya (Campos) pa rin…That started the rift because I’ve been hearing not so nice things about him when they were dating. As a sister, I want the best for my sisters, I’m the eldest. I think minasama niya iyun.”

Sinabi pa ni Sen. Nancy na taong 2016 nang magsara ng pintuan si Mayor Abby sa kanilang pamilya nang hindi na ito nagpupunta sa kanilang lingguhang panangha­lian kung saan sila nagkikita-kitang magpapamilya.

Bilang ate nina Abby at Junjun, si Senadora Nancy pa rin ang nagiging “voice of reason” at alam niya mismo na parehong talo ang kanyang magkapatid sa kanilang away bagama’t si Junjun ang kanyang sinusuportahan dahil nga sa hindi nakapag-deliver ng dapat na serbisyo sa mga taga-Makati si Mayor Abby.

Ang tanong na nga lang ay magkakasundo pa kaya ang magkapatid na Abby at Junjun matapos magdesis­yon ang mga taga-Makati sa Mayo 13. Sana naman. (Sidebar / RAYMOND BURGOS)