TARGET ni KA REX CAYANONG

SA pagpasa ng Republic Act (RA) 11982, ipinakikita ni Pangulong Ferdinand “Bongbong” Marcos Jr. ang kanyang malasakit at pagpapahalaga sa ating senior citizens.

Isang hakbang ito patungo sa pagbibigay ng kaukulang pagpapahalaga at suporta sa ating mga nakatatanda.

Sa ilalim ng bagong batas, ang mga octogenarian at nonagenarian ay makatatanggap ng P10,000 na cash gift sa pagtuntong ng edad na 80, at bawat limang taon pagkatapos nito hanggang sa edad na 95. Ito ay bahagi ng pagpapalawak ng saklaw ng kasalukuyang Centenarians Act, na nagbibigay ng P100,000 cash gift para sa mga taong may edad na 100 taon.

Kaya pinapurihan ni House Deputy Majority Leader at ACT-CIS Party-list Cong. Erwin Tulfo ang pagpapasa ng batas, na siya rin mismong nagtulak nito kasama ang iba pang mga kinatawan ng kanilang party-list.

Ayon kay Tulfo, ito ay isang patunay na tunay na may malasakit ang ating pamahalaan sa ating senior citizens.

Dagdag pa ni Tulfo, “Siguradong matutuwa ang mga senior citizen natin dahil sa panibagong benepisyo na kanilang matatanggap.”

Ang pagpasa ng batas ay nagpapatunay na ang kasalukuyang administrasyon ay tunay na naglalaan ng pansin at tumututok sa kapakanan ng ating mga nakatatanda. Hindi lamang ito simpleng pagbibigay ng pera kundi isang paraan upang ipakita ang pagpapahalaga at respeto sa mga taong naglaan ng kanilang buhay para sa bayan.

Sa pamamagitan ng pagpapasa ng RA 11982, lumikha rin ng isang Elderly Data Management System upang tiyakin na ang mga benepisyo ay maibibigay sa tamang mga senior citizen.

Sa kabuuan, ang hakbang na ito ay isang patunay na patuloy na nagbibigay ang pamahalaan ng suporta at pag-aalaga sa nangungunang mga sektor ng ating lipunan.

Ito ay isang pagpapatunay na sa ilalim ng pamumuno ni Pangulong Marcos, patuloy ang pagtutok sa pagpapaunlad at pagpapalakas ng ating bansa, na may pagpapahalaga sa lahat ng mga sektor ng ating lipunan.