TARGET ni KA REX CAYANONG

MISTULANG napipi daw sa pagkabigla si Silang, Cavite Mayor Kevin Anarna matapos matanggap ang balitang mayroon siyang suspension order mula sa Office of the Ombudsman kaugnay sa isang maliit na halagang transaksyon.

“Kami, kasama ang lokal na pamahalaan ng Silang, ay patuloy na nakatuon sa pagseserbisyo sa aming mga mamamayan. Ngunit, ang pagpapataw ng ganitong uri ng suspension ay tila labis at hindi naaayon sa tunay na kalagayan ng aming serbisyo,” ani Anarna.

“Ang aming pinapakita sa aming mga gawa at salita ay nagpapatunay ng integridad ng aming mga aksyon. Kami ay hindi naniniwala na ang mga hakbang na ito ay dapat na nagsisilbing parusa kundi bilang isang hakbang na pangpreventa ayon sa mga alituntunin ng Ombudsman. Inaasahan namin na ang mga proseso ng Kagawaran ng Interyor at Pamahalaang Lokal (DILG) ay itataguyod upang tiyakin na ang aming karapatan ay maalagaan habang sinusunod ang utos ng suspensyon,” aniya.

Naninindigan si Anarna na ang lahat ng mga aksyon, kabilang ang mga transaksyon na binanggit, ay isinagawa alinsunod sa mga batas at regulasyon.

Agad niyang tinugunan ang anumang mga obserbasyon mula sa Commission on Audit (COA) at naniniwala siya na ang kanilang mga hakbang ay maaaring patunayang wasto at maayos.

“Kung ihahambing sa mga dating administrasyon, kung saan ang mga ulat ng COA ay nagpapakita ng daan-daang milyong piso ng “irregular” o “illegal” na gastusin, ang aming kaso ay tila lamang isang maliit na bagay. Hindi makatarungan na kami ay parusahan sa paraang ito, lalo na kung ang mga nagmumungkahing ito ay may mga personal na interes,” ani Anarna.

“Mariing kinokondena namin ang anumang pulitikal na motibo at duwag na hakbang na ito. Ito ay tila isang hakbang upang isantabi ang tunay na pangangailangan at kagustuhan ng mga mamamayan ng Silang. Ang suporta ng aming mga kababayan ang nagbibigay sa amin ng lakas upang ipagpatuloy ang laban laban sa ganitong uri ng pang-aapi at panlilinlang,” dagdag pa ng alkalde.

Inulan naman ng suporta si Mayor Anarna mula sa mga taga-Silang at mga netizens.

“Husay, galing, talino at malasakit. Mahal ka ng ating mga kababayang Silangueñong hanggang ngayon 100 porsiyentong naniniwala at nagtitiwala sa’yo. Abangan namin ang iyong pagbabalik na mas pinatibay para sa kapakanan ng bayan ng Silang,” wika ni Don Badz Reyes Vlog.

“Anarna pa din kahit ‘di ako taga-Silang. Taga-Dasma ako pero ang daming nagbago mula nang maupo po kayong mayor…” sabi ni Ecijan Ciscofran.

“Still my best mayor ka,” ani Merie Jane Frondozo.

“Nasaan ngayon ang harap ng tunay na katotohanan kung para sa likod ng nakaraan kasinungalingan,” giit naman ni Annaliza Escalante Araza.

“Kaya mo ‘yan insang Atty. Mayor,” pahayag naman ng suporta ni Pedro Amutan.

Samantala, ayon naman kay Anarna, sa huli, “nais naming tiyakin sa aming mga minamahal na kababayan na patuloy kaming maglilingkod nang tapat at maayos. Ang aming pangako ay nananatiling matatag, at ang aming layunin ay patuloy na magsilbi para sa ikabubuti ng lahat at sa pag-unlad ng Silang.”

Sinabi pa ng masipag na alkalde na ang suporta at pagtitiwala ng mga Silangueño ang siyang nagbibigay sa kanya ng lakas upang ipagpatuloy ang laban, at sa huli, ito ang magiging pundasyon ng isang mas maunlad na Silang.