QUEZON – Tatlong tinedyer na magkakaangkas sa motorsiklo, ang malubhang nasugatan makaraang pagbabarilin ng backrider nang nakasalpukan nilang motorsiklo sa bayan ng Candelaria sa lalawigang ito, nitong Linggo ng madaling araw.

Inilipat sa ospital sa Lucena City ang mga biktimang sina Genove Estolano, 19;  Kien Ivan Estolano Delos Reyes, 18, at isang 14-anyos na binatilyo.

Batay sa report, magkakaangkas ang tatlo at tinatahak ang barangay road ng Barangay Mangilag Sur, nang makasalpukan nila ang motorsiklong minamaneho ng kanilang kaanak at ka-baranggay na si Ladislao Dequito Tubo, 44-anyos dakong ala-1:10 ng madaling araw.

Nagkaroon sila ng pagtatalo na ikinagalit ng backride ni Tubo na si Bernie Olvida, 24, tubong Tanauan City.

Pagkaraan ay biglang nagbunot ng baril si Olvida at pinaputukan ang tatlong biktima.

Makaraan ang pamamaril ay tumakas ang mga suspek ngunit nadakip si Tubo sa follow-up operation.

Pinaghahanap ng mga awtoridad si  Olvida habang inihahanda  ang kaso laban sa mga suspek. (NILOU DEL CARMEN)