CAVITE – Patay ang isang babae nang masagasaan ng isang delivery truck habang tumatawid sa kalsada sa bayan ng Indang sa lalawigan noong Sabado ng umaga.

Isinugod sa General Emilio Aguinaldo Hospital ang biktimang si alyas “Jenny” subalit hindi umabot nang buhay.

Nasa kustodiya na ng Indang Municipal Police Station ang driver ng delivery truck na may plakang NAR 2723, na kinilalang si alyas “Tomas”.

Ayon sa driver ng delivery truck, binabagtas nito ang kahabaan ng San Miguel St., Brgy. Poblacion 3, Indang, Cavite bandang alas-10:35 ng umaga nang hindi nito napansin ang pagtawid ng biktima kaya nasagasaan ito at pumailalim pa sa kanyang sasakyan.

Mabilis namang nagresponde ang ambulansya ng MDRMO at isinugod sa ospital ang biktima subalit idineklarang dead on arrival habang naaresto naman ang driver ng delivery truck. (SIGFRED ADSUARA)