ARESTADO sa Tarlac ng Bureau of Immigration (BI) operatives ang isang American national na matagal nang wanted dahil sa ‘string of felony cases’ sa Estados Unidos.

Kinilala ni Immigration Commissioner Jaime Morente ang puganteng 40-anyos na si John Dalton Daclan.

Nadakip si Daclan noong Martes sa Brgy. San Juan, Moncada, Tarlac, ng mga miyembro ng BI’s Fugitive Search Unit (FSU).

Sinabi ni Morente, iniutos niyang arestuhin si Daclan matapos hilingin ng US authorities at ipabatid ang criminal records ng Kano sa US, partikular sa California na kung saan siya sinampahan ng iba’t ibang kaso.

Idinagdag pa ni Morente, ang Kano na made-deport hindi lamang bilang undesirable alien kundi dahil sa pagiging sa ‘overstaying and being undocumented’ na nag-ugat mula sa pagkansela ng State Department ng US passport nito.

“He will also be blacklisted and banned from re-entering the country,” dagdag niya.

Ayon sa records, si Daclan ay subject ng tatlong arrest warrants na inisyu ng Orange County Superior Court sa California noong Hunyo 21, 2010.

Ang suspek ay kinasuhan sa naturang korte dahil sa ‘unauthorized use of identification, grand theft, forgery, burglary, display of false identification, fraud, battery and receiving stolen property’ na paglabag sa California’s Penal Code.

Si Daclan kasalukuyan nakakulong sa BI warden facility sa Camp Bagong Diwa, Taguig City habang nakabinbin ang kautusan para sa kanyang summary deportation. (JOEL O. AMONGO)