ISA ako sa natutuwa sa bumobonggang career ngayon ni Mariel de Leon sa New York.
Pinag-uusapan nga ng mga kabadingan na kasama pala siya sa fashion show ni Kim Kardashian sa New York Fashion week.
Nasa Instagram account niya ang ilang kuha doon sa fashion show na ibang-iba ang dating at aura niya.
Noon pa naman gusto na talaga ni Mariel na pasukin ang modeling.
Tamang-tama naman doon nag-migrate ang kuya niyang si Gabriel kaya may kasama naman siya roon.
Noong nakaraang Pasko nga doon sa Amerika si Sandy Andolong nagbakasyon at medyo nagtagal siya roon para makasama ang mga anak niya.
Nakatutuwa na lumaking mabait at napaka-independent ng mga anak nina Boyet at Sandy. Madasalin pa silang mag-asawa kaya naman blessed silang pamilya.
Ito nga ang isang blessing na dumating sa kanila, kinuha ng Beautederm si Boyet para sa kanilang men’s line. Next week na ang contract signing niya at siyempre ang saya-saya ko dahil iri-renew rin ng Beautederm si Lorna Tolentino. Kaya thank you Lord talaga at salamat siyempre kay Rhea Tan na napakabait sa amin.
ALDEN ‘DI NAGPA-CHRISTMAS PARTY SA PRESS
Nagtataka pala ako bakit hindi nagpa-Christmas party si Alden Richards sa press?
Naku ha? Ang dami niyang blessings noong 2019 at tuluy-tuloy pang bumobongga ang career niya ngayong 2020. Kaya dapat magpa-thanksgiving siya sa media at movie press ‘di ba?
Pero mabait kasi talaga si Alden, kaya happy pa rin kaming lahat sa magagandang blessings na dumating sa buhay niya at sa career.
Katatapos lang ng taping niya sa The Gift at ngayon nakasalang na naman siya sa bagong show na ibang-iba raw ito sa lahat na nagawa niya.
Siya ang host ng bagong musical competition na Centerstage.
Mga bata muna ngayon ang mga kasali, edad mula 7 hanggang 12.
Ibang konsepto ito na sabi nga niya, ibang challenge din ito sa kanya bilang host.
“I’m very proud of this show kasi it’s an original concept of GMA. So, talagang pinag-isipan ito nang masinsinan para mabigyan po ng bagong flavor ‘yung singing contest.
“Now po, ‘yung unang roster po ng constestants na ipapakita natin is for the kids. Pero not necessary po na we’re limiting the contestants sa mga bata,” pahayag ni Alden.
Kasama niya rito si Betong Sumaya na co-host niya at ang judges ay sina Pops Fernandes, Mel Villena at Aicelle Santos.
Nagkaroon sila ng mediacon noong nakaraang Huwebes at isa sa napag-usapan doon ay ang pagsasama nila ni Bea Alonzo sa isang project.
Nakita silang magkasama dumating sa Bangkok, Thailand kamakailan lang para mag-shoot doon.
Hindi lang muna niya puwedeng sabihin kung ano ito. Basta abangan na lang daw.
Nakatutuwa raw na ngayon kasama niya sa isang project si Bea.
“Magaan siyang kasama. Sobrang fan po ako ng ‘One More Chance’, alam ni Bea ‘yun.
“Nung nakita ko sila ni John Lloyd parang first time ko na-starstruck. Pero ngayon parang ang sarap sa feeling na idol mo lang dati, ngayon katrabaho mo na ngayon. Ang sarap lang ng experience,” saad ni Alden.
Anyway, abangan na lang natin itong Centerstage niya na magsisimula na sa February 16, Linggo, pagkatapos ng ‘Daig Kayo ng Lola Ko’.
176
