PINANGALANAN na ni Pangulong Ferdinand “Bongbong” Marcos Jr. si Health Undersecretary Maria Rosario Vergeire bilang officer-in-charge (OIC) ng Department of Health (DOH) at hinirang naman si dating Light Rail Transit Authority administrator Mel Robles bilang general manager ng Philippine Charity Sweepstakes Office (PCSO).
Inanunsyo ito ni Press Secretary Trixie Cruz-Angeles sa isang press briefing nitong Huwebes.
“Ngayong araw po ay itinalaga po si Dr. Rosario Vergeire bilang OIC ng Department of Health,” ayon kay Cruz-Angeles.
Bago ang kanyang appointment, nagsilbi si Vergeire bilang DOH Undersecretary for Public Health Services Team.
Noong Hunyo nang ipagkatiwala kay Vergeire na pamunuan ang National Vaccination Operations Center (NVOC), ang “body” na inatasan na tiyakin ang tamang “storage, inventory and delivery of coronavirus disease 2019 (COVID-19) vaccines” at i-develop ang tamang guidelines para sa national vaccination program against the coronavirus.
Samantala, si Robles, ani Cruz-Angeles ay kinilala sa kanyang naging mahalagang gampanin na gawin ang LRTA na “profitable” sa ilalim ng kanyang liderato.
Si Robles ay dating board member ng Intercontinental Broadcasting Corporation.
Sa kabilang dako, hindi pa rin nakapagpapalabas ang Malakanyang ng appointment papers nina Vergeire at Robles.
Welcome naman sa DOH ang pagtatalaga kay Vergeire bilang OIC.
“[The] DOH appreciates the President’s confidence in one of its career executives, including the immense responsibility such trust brings,” ayon sa DoH sabay sabing “Each and every member of the DOH family shall work together to continue the gains instituted by previous administrations.”
Tiniyak din ng departamento sa publiko na ginagawa na nito ang lahat ng kanilang makakaya tungo sa universal health care para sa mga Pilipino. (CHRISTIAN DALE)
258 
