AABOT sa 13 milyong botante ang makikinabang kung palalawigin ng Commission on Election (Comelec) ang voter registration hanggang Oktubre 31, ngayong taon.

Kaya naman hiniling nina Kabataan party-list Rep. Sarah Elago at Gabriela party-list Rep. Arlene Brosas ang pagpapalawig sa pagpaparehistro lalo na’t nabawasan ang pagkakataon ng mga nais makaboto sa susunod na halalan dahil sa mga ipinatutupad na iba’t ibang uri ng lockdown, hindi lamang sa Metro Manila kundi sa iba’t ibang panig ng bansa.

“Since the onset of the pandemic, we have had a five-and-a-half-month suspension (March 10 – August 31, 2020) which is equivalent to approximately 28.3% or 164 days of the voter registration period across the country,” ani Elago.

Lalong nawalan ng pagkakataon aniya ang mga botante na makapagrehistro dahil maraming lugar sa bansa kasama na ang Metro Manila ang isinailalim sa enhanced community quarantine at modified ECQ dahil sa Delta variant.

Dahil dito, kailangan aniyang palawigin hanggang Oktubre 31 mula sa dating deadline na Setyembre 30 ang pagpaparehistro sa Comelec upang makaboto sa 2022 election.

Kung hindi ito palalawigin, sinabi ni Brosas na aabot sa 13 million Filipino ang hindi makakaboto sa darating na halalan. (BERNARD TAGUINOD)