Ipinagmalaki pa ang paggamit ng smuggled vaccine MON TULFO WALANG HIYA – SOLON

0

(BERNARD TAGUINOD)

“HINDI na nahiya, mali na nga ang ginawa, ipinagyayabang pa.”

Ito ang pahayag ni Gabriela party-list Rep. Ferdinand Gaite sa ipinagyayabang umano ni Special Envoy to China na si Ramon Tulfo na nabakunahan na ito ng Sinopharm vaccine.

Isinulat ni Tulfo sa kanyang kolum sa Manila Times na nabakunahan na ito ng Sinopharm kasama ang ilang gabinete ni Pangulong Rodrigo Duterte at isang senador.

Ayon kay Gaite, ilegal ang ginawa ni Tulfo dahil malamang ay smuggled ang bakunang itinurok sa kanya dahil hanggang ngayon ay hindi pa nag-a-apply ang manufacturer ng nasabing bakuna ng Emergency Use Authorization (EUA).

“Tulfo’s illegal act of self-inoculation and use of smuggled vaccines should be grounds to deny him license for future distribution of Sinopharm vaccines. Hanggang ngayon wala pang bakuna para sa mamamayan, pero itong mga alipores ng pamahalaang Duterte, tuloy-tuloy ang pag-smuggle ng bakuna at VIP vaccination,” ayon sa mambabatas.

Ang Sinopharm ay kabilang sa dalawang COVID-19 vaccine na gawang China at noong nakaraang taon ay nabuko na naturukan na nito ang ilang sa mga miyembro ng Presidential Security Group (PSG).

“Talagang malakas ang loob nilang gumamit ng smuggled vaccines dahil nauna nang pinalusot itong ilegal na vaccination ng PSG. Palulusutin din ba nila itong ginawa ng kanilang Special Envoy? Sasabihin na naman ba nila na mag-move on na lang tayo?,” tanong pa ni Gaite.

Ang mga health worker at iba pang frontliners ay naghihintay pa ng bakuna hanggang ngayon samantalang gumagamit na umano ng mga smuggled vaccine ang mga alipores ni Duterte tulad ni Tulfo.

“Isinisisi ng pamahalaan ang kanilang kapalpakan sa problema diumano sa supply chain, pero apparently they are not encountering problems in the supply of smuggled vaccines. Hindi ito dapat palampasin. Dapat itong imbestigahan, at dapat may managot dito,” ayon pa sa kongresista.

Read More

PARANGAL KAY VICO PINURI SA SENADO

0

PINAPURIHAN ni Senador Panfilo Lacson ang pagkakapili kay Pasig City Mayor Vico Sotto bilang isa sa 12 personalidad na tinukoy bilang International Anti-corruption Champions” ng US State Department.

Ang pagsaludo sa batang Sotto ay isiniwalat ni Lacson sa pamamagitan ng Twitter.

“The bright beacon of the land,” saad ni Lacson na tumutukoy kay Mayor Sotto.

Ipinaalala rin ni Lacson na dapat magtaglay ng seryoso at matapang na kampanya laban sa korapsiyon ang mga umuusbong na maaring maging susunod na lider ng bansa.

“At least we have good reason not to give up hoping for our beloved country. As one very successful businessman recently told me – for the longest time, our country is like a boat full of holes that doesn’t sink only because we keep bailing the water out. Nobody has thought of bringing it to a dry dock for repairs,” dugtong pa ni Lacson.

Una sa pahayag na ito ay naibalitang kasali si Mayor Sotto sa 12 indibidwal na na kinilala ng US State Department sa bagong lunsad na programang “International Anticorruption Champions Award.”

Binigyan ng pagkilala ng naturang gawad-parangal ang mga walang pagod na nagpapatupad ng transparency, lumalaban sa korapsiyon at umaako sa pananagutan bilang lider sa mga bansang kinabibilangan. (ESTONG REYES)

Read More

PAGHAHATI SA MAGUINDANAO NAPAPANAHON

0

NANINIWALA si Senador Francis ‘Tol’ Tolentino na mas bubuti ang kalagayan ng ekonomiya at sitwasyong politikal sa Maguindanao kung ito’y hahatiin sa magkahiwalay na lalawigan.

Sinabi ni Tolentino, chairman ng Senate Committee on Local Government, hinog na ang panahon upang mahati sa dalawang probinsya ang Maguindanao upang mas mapabilis ang pasok ng mga pangunahing serbisyo na may kinalaman sa edukasyon, kalusugan, at transportasyon sa mga liblib nitong komunidad.

Si Tolentino ang pangunahing may akda sa Senado ng panukalang batas na layong hatiin ang nasabing probinsya sa ilalim ng Bangsamoro Autonomous Region in Muslim Mindanao (BARMM)—ang Northern Maguindanao at Southern Maguindanao.

Paliwanag ng senador, bagama’t biniyayaan ng likas na yaman ang Maguindanao kabilang na ang Liguasan Marsh, hindi pa rin tuluyang makausad ang lalawigan tungo sa pag-unlad dahil sa ilang mga balakid na kinakaharap tulad na lamang ng seguridad.

Sa ilalim ng partition plan, 12 munisipalidad ang bubuo sa lalawigan ng Northern Maguindanao, samantalang 24 na bayan ang magiging kasapi ng Southern Maguindanao. (NOEL ABUEL)

Read More

DTI PINAKIKILOS SA MAHAL NA TUYO AT DILIS

0

NANAWAGAN si Sen. Grace Poe sa Department of Trade and Industry (DTI) na kumilos patungkol sa mga ulat na tumaas na rin ang presyo ng tuyo at dilis sa mga pamilihang bayan o palengke at kakaunti na lamang ang nabibili ng mahihirap sa bawat tingi nitong nakabalot o nakapakete.

Ayon kay Poe, kailangang kumilos kaagad ang DTI matapos umanong umabot na sa P300 hanggang P400 ang bawat kilo ng tuyo sa mga palengke at ang presyo naman ng dilis ay nasa P400 hanggang P600 ang kilo.

“‘Yung mga kababayan nating mahihirap, nagtitiis na lamang sa pagbili ng tingi pero ang masakit nito, tingi na nga lang, ang mahal pa ng nabibili nilang tuyo at dilis sa bawat paketeng maliit. Halos ilang pirasong tuyo na lang at kakarampot na dilis ang laman nito,” ani Poe.

Idinagdag ni Poe na napakalaki diumano ang ipinapatong ng mga mapagsamantala sa mga itinitindang tuyo at dilis samantalang mababa naman nila itong nabibili nang wholesale sa mismong mga pamilihan o angkatan ng dried fish.

Kaugnay nito, nanawagan din si Poe sa lokal na pamahalaan na kaagad gumawa ng kaukulang aksiyon at tulungang sugpuin ang anomang pagsasamantala sa mga mamimili sa mga palengkeng kanilang nasasakupan. (ESTONG REYES)

Read More

SARA 2022 IBINASURA NI DIGONG

0

(CHRISTIAN DALE)

KINONTRA ni Pangulong Rodrigo Roa Duterte ang ideya na tumakbo sa pagka-pangulo sa 2022 elections ang anak na si Davao City Mayor Sara Duterte-Carpio.

Ang dahilan ng pangulo, kababuyan ang politiko sa bansa sabay bira sa kanyang long-time critic na si dating Senador Antonio Trillanes IV.

Pinangunahan ni Pangulong Duterte ang situation briefing hinggil sa epekto ng bagyong “Auring”, Martes ng gabi sa Tandag City, Surigao del Sur, nang bigla na lamang hikayatin ni Governor Alexander Pimentel ang pangulo na ang ipalit sa kanya ay si Mayor Duterte-Carpio o si Senador Christopher Lawrence “Bong” Go sa oras na magtapos na ang kanyang termino.

“Inday Sara is not running. I have really, really put my foot down. Naaawa ako sa anak ko. Ang politiko dito, kababuyan. Trillanes. Pati yung anak kong 16 years old, ginawa pa doong drug lord. Be careful of Trillanes, be careful of Trillanes,” diing pahayag ng pangulo.

“Magbantay kayo, he will sell you to the devil; ‘pag yan nakaupo, patay. Ako, sabi ko sa mga Pilipino, ‘pag yan naging opisyal n’yo, di kayo… Walang hiya yan, sa totoo lang,” giit ng Chief Executive.

Sa kabilang dako, sinabi naman ni Gov. Pimentel na kailangan na mayroong “continuity” sa counter-insurgency campaign.

Sa ulat, nanindigan si Mayor Sara na hindi talaga siya tatakbo sa pagka-pangulo.

 

TERM EXTENSION
SA CHA CHA

Samantala, hindi maiiwasan ang political amendments sa Charter Change (Cha-Cha) na sinimulang pagdebatehan na sa mababang kapulungan ng Kongreso sa sandaling mag-convene ang Senado at Kamara bilang Constituent Assembly (Con-Ass).

Ito ang ikinatatakot ni Assistant Minority Leader Gabriel Bordado Jr., dahil magkaiba ang nais mangyari ng mga senador at congressmen sa Cha-Cha.

Sa lingguhang press conference ng minority bloc sa Kamara kahapon, sinabi ni Bordado na bagama’t pawang economic provisions ang isinusulong sa mababang kapulungan, nais naman umano ng ilang senador na isama ang ‘democratic provision” sa kanilang aamyendahan sa 1987 Constitution.

“While both Houses seek to introduce specific amendments, the House specified the economic provisions but the Senate is explicit in including democratic representations as among those to be amended,” ani Bordado.

“When we talk about democratic representation it becomes an open field for self-serving term extension of incumbent elected officials including ourself,” dagdag pa ng mambabatas.

Bukod dito, labag din umano sa Saligang Batas ang Economic Cha-Cha ng Kamara. Kailangan aniyang amyendahan muna ang isinasaad sa Saligang Batas na, “the state shall develop a reliant and independent national economy effectively controlled by Filipinos”.

Subalit ayon kay Albay Rep. Joey Salceda, kailangang amyendahan na ang restrictive provisions sa Saligang Batas sa pagpasok ng mga dayuhang negosyante sa Pilipinas at matigil na ang pag-spoil sa ilang lokal na negosyante na kumokontrol sa merkado. (BERNARD TAGUINOD)

Read More

GOV’T SUPPLIERS, CONTRACTORS DAPAT BAYARAN – SOLON

0

UMAASA ang isang mambabatas sa minority bloc sa Kamara na bibigyan ng agarang aksiyon ng mga kinauukulang ahensiya ng pamahalaan ang animo’y pagsusumamo ng iba’t ibang government suppliers at contractors na sila ay mabayaran lalo’t hirap na rin sila dulot ng nararanasang pandemya.

Ayon kay House Deputy Minority Leader at Marikina City Rep. Bayani Fernando, kung dapat palakasin ang ‘Build, Build, Build’ program na kabilang sa hakbanging muling ibangon at pasiglahin ang ekonomiya ng bansa na sumadsad sanhi ng national health crisis, kinakailangang tapatan ito at maging masigasig din ang gobyerno sa pagpapatupad ng ‘Pay, Pay, Pay’ mechanism.

Babala ng ranking House minority official, kung patuloy na uupuan ng mga government agency ang obligasyon nila sa kani-kanilang suppliers at contractors, maaaring humantong ito sa pagkalugi hanggang sa tuluyang pagsasara sa negosyo at magreresulta pa sa pagkawala ng trabaho ng kanilang mga empleyado.

“For these reasons that I would like to appeal and call the attention of the people in the government involved in the disbursement of payments to goods and services delivered by contracting entities and individuals to exert effort and expedite the processing of payments to keep production going and stave off closures amid the economic recession,” ang panawagan ni Fernando.

Base sa datos na nakalap ng Marikina City lawmaker, noon lamang taong 2019 umano ay sampung ahensiya ng pamahalaan ang may malaking pagkakautang, kabilang na ang Department of Public Works and Highways (DPWH), Department of Transportation (DOTr) at Department of Education (DepEd), na partikular na nakapagtala ng kabuuang P127.9-B financial liabilities.

Bukod dito, sinabi ni Fernando na base sa report ng Commission on Audit (COA), umaabot sa P53.2-B na guaranty/security deposits ng government suppliers at contractors ang hindi pa rin nare-release.

“The business sector has a big role to play to revive the economy. But if their resources are held by the government, they have no choice but to resort to lay-offs or to close their businesses. More lay-offs are bound to happen if the government will continue with its non-payment,” paalala pa ng kongresista.

“Infrastructure projects has always been the panacea of all governments to address recession as it is productive and a good investment. It is never a waste of money. However, BUILD, BUILD, BUILD must go with PAY, PAY, PAY,” pagbibigay-diin pa niya. (CESAR BARQUILLA)

Read More

370 PAMILYANG BIKTIMA NG BAGONG ULYSSES SA BULACAN, TUMANGGAP NG AYUDA

0

MAHIGIT 370 pamilya na biktima ng bagyong Ulysses ang nabigyan ng tulong ni Senador Christopher Lawrence “Bong” Go sa bayan ng Pulilan, Bulacan.

Sa pahayag, personal na iniabot ni Go ang iba’t ibang tulong sa mga nasalanta ng kalamidad na sinaksihan ng ilang mga local na opisyal sa nabangit na bayan.

Kabilang dito ang ilang grocery, vitamins, facemask at face sheild ang tinanggap ng mga benepisyaryo bukod pa ang tig-P5,000 na tulong pinansiyal na mula naman sa Department of Social Welfare and Development (DSWD).

Nagbigay rin ng ayuda ang Department of Trade and Industry, Department Agriculture, at Department of Health.

Samantala, may 25 na bisikleta at 25 computer tablets ang ipina-raffle sa mga na apektuhan ng nakaraang kalamidad. (ESTONG REYES)

Read More

MASISISI NYO BA ANG TAO NA MAGALIT?

0

HINDI ko masisisi ang mga tao na madismaya dahil napag-iiwanan na tayo sa covid-19 vaccination dahil maging ang mga maliliit at mahihirap na bansa tulad ng Bangladesh ay nagsimula nang magbakuna pero tayo ay nganga pa rin hanggang ngayon.

Tayo ang may pinaka-istrikto at pinakamahabang lockdown sa mundo dahil hanggang ngayon ay nasa general community quarantine pa rin tayo, pero nahuhuli pa rin tayo sa pagbabakuna.

Nabaon na rin tayo sa utang dahil sa pandemya, pero hindi pa nararamdaman ng mga tao ang positibong epekto ng napakahabang lockdown at napakalaking inutang ng gobyerno dahil sa pandemyang ito.

Buryong na buryong na ang mga tao at marami na ang matagal ng gutom pero wala pang kasiguraduhan kung kailan makakalaya ang mga tao dahil mayroong mga opisyales ng gobyerno ang pumalpak sa kanilang trabaho.

Noong isang taon pa pinag-uusapan ang bakuna at pinangakuan tayo na Disyembre pa lamang ay magsisimula na ang mass vaccination pero anong petsa na? Hanggang ngayon, hindi pa natin naaaninag ang anino ng bakuna.

Muli tayong pinangakuan na kalagitnaan daw ng Pebrero ang dating ng unang batch ng bakuna para sa mga frontliners pero hindi ito dumating kaya paanong hindi magagalit ang mga tao.

Simula pa lang ng pandemya, palpak na sila dahil mas binigyan nila ng importansya ang diplomatikong relasyon nila sa China kesa sa kapakananan ng ­sambayanang Filipino.

Ngayon halatang halata na pumalpak na naman sila sa pagbili ng bakuna dahil may mga ­opisyales ng gobyerno na hindi agad ginawa ang kanilang ­assignment para magkaroon tayo supply.

Alam naman siguro ni Health Secretary Francisco Duque III na requirements ng mga vaccine manufacturers na ang mga gamot na ginawa nila ay para sa Emergency Used Authorization kaya nangangailangan ito ng indemnification agreement pero hindi agad trinabaho?

Hindi agad nag-order gayung matagal nang pumila ang mga ibang bansa tulad ng Amerika at Israel sa mga gamot na gawa sa ibang bansa maliban sa China at nang maka-order na, hindi pa pala ibinibigay ang requirements.

Ngayon lang sila magkukumahog kung kailan nalaman nila na hindi maidedeliber ang inorder na bakuna kung hindi ibibigay ang requirements na hinihingi ng mga manufacturer.

Ngayon, masisisi nyo ba ang mga tao na magalit? Kaya nga nandyan ang opisyales ng ­gobyerno para magsilbi sa taumbayan. Ano pa’t nandyan kayo kung hindi rin lang nyo naman pala ginagawa ang trabaho nyo?

Hindi nyo puwedeng sabihin na kaya nandyan kayo ay para sa kawanggawa dahil sinusuwelduhan kayo ng taumbayan mula sa buwis na kanilang binabayaran. Kayo na nasa gobyerno ay hindi naman naapektuhan ang suweldo sa panahon ng pandemya dahil buo pa rin ang tinatanggap nyong sahod kumpara sa mga nasa pribadong sektor na kung hindi binawasan ay hindi na pinapasok sa trabaho.

Hindi ko rin masisisi ang iba na mag-isip na talagang drinibol ang pagbili ng mga bakuna na gawa sa Western Countries para hintayin ang bakuna na gawa ng China tulad ng Sinovac.

May mga Congressmen tuloy ang nagdududa na sadyang ginawa ang kapalpakang ito para mas maunang dumating ang mga bakunang gawa ng China na ­pinagdududahan kung epektibo ba talaga o hindi.

Nabasa nyo naman siguro ang sinabi ng FDA director ­general na hindi puwedeng gamitin sa medical frontliners at senior citizens ang Sinovac di ba?

 

Read More

FACE TO FACE CLASSES ‘DI PA DAPAT

0

HINDI rin sang-ayon ang PUNA sa panukala ng ibang opisyal ng gobyerno na magkaroon na ng face to face classes.

Sang-ayon tayo sa sinabi ni Pangulong Rodrigo Duterte na ­dapat ay mayroon munang ­bakuna bago ang face to face na pagpasok ng mga bata sa ­eskwela.

Mahirap na baka sa halip na makabuti ay makasama pa at biglang dumami ang may ­Covid-19.

Lalo na ngayon na may UK variant na tinatawag. Madali pa man din itong makapanghawa.

Mas nakakasiguro tayo na ligtas ang ating mga anak kung magkaroon muna ng bakuna bago sila payagan sa face to face class.

Kamakailan ilang mga medical experts ang nagsabi na hindi porke’t nabakunahan na tayo ay hindi na rin tayo magkakaroon ng covid.

Mahalaga pa rin ang pag-iingat o pagsunod sa health protocols.

Napakahalaga na magkaroon tayo ng sariling disiplina sa pamamagitan ng pagsusuot ng face mask at face shield.

Kailangan din manatili ang ­ating kaugalian na magdala tayong lagi ng alcohol at ugaliin ang paghuhugas ng mga kamay.

Kung dati ay balewala sa atin ang kalinisan at posibleng hawahan, dapat ngayon maging ­maingat na tayo sa tinatawag na “new normal”.

Iba na kasi ang panahon ngayon, maraming sakit ang mga naglalabasan na dahil na rin siguro sa labis na kaburaraan.

Hangga’t maaari may pananggalang tayo sa anumang posibleng sakit na maaaring makuha natin sa ating kapwa.

Kailangan sa lahat ng panahon ay maingat tayo. Kung dati ang uso sa inuman ay iisa lang ang baso na pinaiikot, ngayon ‘wag na natin gawin.

Napatunayan na natin na ang ganitong style ng inuman ay pinagmulan ng maraming hawaan ng Covid-19.

Sa ganitong tagay dito at tagay doon na style ng inuman lalo na sa mga kanto ay hindi lang Covid-19 ang maaaring maipasa sa ating kainuman kundi maging ang sakit na Tuberculosis o TB.

Marami tayong dapat baguhin dahil sa naranasan natin sa Covid-19.

Nang sa ganun kung magkaroon man ng iba pang sakit na nakakahawa na tulad nito ay hindi na ito masyadong makakapaminsala sa mga Pinoy.

Kaya big “NO” tayo sa face to face classes hanggat walang bakuna.

Bakuna muna, bago face to face classes.

Mahirap na kalaban ang Covid-19, ‘wag natin ilagay sa alanganin ang ating pamilya.

Kung maiiwasan natin na lumayo muna sa maraming mga tao ay gawin pa rin natin.

Tutal malapit na tayong magkaroon ng bakuna para sa covid.

Konting tiis pa, malalagpasan din natin ang pagsubok na ito.

Kailangan may malasakit tayo sa ating kapwa.

Bahala na si Lord sa atin, basta tayo ay gumagawa ng mabuti para sa tao.

oOo

Para sa suhestiyon at reaksyon mag-email joel2amongo@yahoo.com at operarioj45@gmail.com o kaya magtext sa 0919-259-59-07.

Read More