ILOILO – Patay ang isang kontrobersyal na barangay chairman na kasapi ng LGBT community, nang pagbabarilin ng hindi pa kilalang mga suspek sa bayan ng Calinog sa lalawigang ito, noong Linggo ng umaga.
Ayon sa pulisya, pauwi ng Tapaz, Capiz ang biktimang si Julie Catamin, 49-anyos, nang pagbabarilin ng mga lalaking nakasakay sa motorsiklo.
Nabatid na si Catamin ay kasalukuyang punong barangay ng Barangay Roosevelt sa bayan ng Tapaz.
Base sa inisyal na imbestigasyon, lulan ng kanyang motorsiklo si Catamin at binabagtas ang Barangay Malitbog Centro, Calinog nang dikitan at pagbabarilin ng mga suspek na sakay rin ng motorsiklo, saka mabilis na tumakas.
Sinubukang pang itakbo sa pagamutan si Catamin ngunit idineklarang dead on arrival ng attending physician dahil sa tama ng bala sa likod. (JESSE KABEL)
