October 14, 2021 - SAKSI NGAYON

‘NO VAX’ PINANINDIGAN NI KYRIE

October 14, 2021 jake

BALITANG NBA Ni VT ROMANO

SINAGOT ni Kyrie Irving ang naunang pahayag ng Brooklyn Nets na hindi siya palalaruin hangga’t walang bakuna o habang epektibo ang New York City mandate.

Sa kanyang Instagram Live, Miyerkoles (Huwebes sa Manila), pinanindigan ni Irving na hindi siya maaaring diktahan ng sinuman sa dapat gawin o sabihin.

Kasabay nito, nilinaw ding hindi siya magreretiro nang dahil lang sa bakuna.

“You know, nobody’s gonna hijack my voice. Nobody’s gonna take the power away from me that I have for speaking on these things,” lahad ni Irving.

“And don’t believe that I’m retiring, don’t believe that, you know, I’m gonna give up this game for a vaccine mandate or staying unvaccinated.”

Dagdag niya, nirerespeto niya ang mga doktor, pati na ang Nets at ang NBA. Pinanghahawakan din niya ang pangako ng team na iaaccommodate siya ngayong season. At nakiusap na huwag gamitin ang kanyang opinion para sa ibang bagay.

“I’m am not an advocate for either side,” ani Irving. “I’m doing what’s best for me, I know the consequences here. You know? And if it means that I’m judged and demonized for that, that’s just what it is. That’s the role I play, but I never wanted to give up my passion, my love, my dream just over this mandate or was happening in our world — I didn’t expect that going into the season. Come on now. I love this game, like, love the game, but sometimes you really got to make choices that ultimately can affect that. And it’s unfortunate, but that’s where we (are) in 2021.”

PISTONS SINAMPOLAN
NG KNICKS

IPINAGPAG ng New York Knicks ang mabagal na simula ng first half at tinalo ang Detroit Pistons, 108-100, Miyerkoles (Huwebes sa Manila) para sa preseason game sa The Garden.

Balanseng atake ang agad ipinakita ng Knicks, apat sa limang starters ay nagsipag-iskor sa lima at kalahating minuto ng laro, sa pangunguna ni Taj Gibson na may six points at umabante ang New York, 14-12.

Ngunit, nanlamig ang Knicks at halos hindi nakaiskor sa loob ng tatlong minuto, bago bumato ng tres si Alec Burks. Nakuha ng Detroit ang 26-20 lead papunta sa second quarter.

Ang second unit ng Knicks ang umatake sa second. Matapos ang three-pointer ni Kevin Knox, sinimulan din niya ang fastbreak at mabilis na pasa kay Burks, nag-alley-oop naman kay Obi Toppin. Kumana si Knox ng isa pang tres sa huling minuto ng quarter.

Nakakuha ng ikalawang offensive foul si Julius Randle bago natapos ang quarter, bagama’t maganda ang opensiba niya. Angat ang Detroit ng four points bago mag-break, sa kabila ng first-half performances mula kina Gibson (10 points, seven rebounds), Derrick Rose (12 points, two assists) at Randle (8 points, five rebounds, two assists).

Umabot ang abante ng Pistons sa pito, pitong minuto sa third, nang magtala si Saben Lee ng 14 puntos.

Ipinagpatuloy naman nina Randle, Rose at Gibson ang opensa ng Knicks, kung saan humirit ng dalawang tres si Randle sa dulo ng quarter para sa kanyang 19th points sa laro.

Muling humirit si Randle ng three at nag-convert din si RJ Barrett ng isa pa at kinuha ng Knicks ang 78-77 lead, kung saan umiskor si Randle ng 16 puntos sa nasabing quarter at bahagyang lumayo ang Knicks, 82-77 papasok sa fourth.

Bagama’t nagpatuloy sa pag-habol ang Pistons at naibaba sa tatlo ang abante, hindi naman nagpabaya sina Gibson at Randle upang ibalik sa walo ang kalamangan, limang minuto pa sa laro. Hanggang tuluyang iwanan ang Detroit.

Natapos ang laro na may 19 points si Randle, kasama ng 11 rebounds at five assists. May 21 points at nine rebounds naman si Gibson.

Habang may 12 points si Barrett, seven rebounds at six assists.

May isa pang preseason game ang Knicks laban sa Washington Wizards sa Biyernes (Sabado sa Manila).

Pagkatapos, haharapin ng New York sa susunod na Huwebes (Manila time) ang Boston para sa kanilang unang regular season game.

CELTICS NAISAHAN
NG MAGIC

MINTIS ang mga shot ni Jeff Dowtin sa praktis niya sa gym.

Ngunit, may eksaktong mintis siya, na naging winning basket ng Orlando Magic laban sa Boston Celtics, Miyerkoles (Huwebes sa Manila) sa Florida.

Abante ng isa ang Boston, wala nang pitong segundo sa laro, giniya ni Dowtin ang Orlando. Pumasok sa painted area, nag-dribble sa kanan at huminto. Sa muling paggalaw, ibinato ang isang 16-foot-turnaround shot, 0.2 seconds na lang… swak!

Ang iskor: 103-102 at isinara ng Magic ang kanilang preseason games.

“It was surreal, man,” ani Dowtin. “I’m still drenched right now. They threw ice water on me and a bunch of water on me. It just goes to show the great group of guys we have, the family atmosphere we have. That is the type of locker room you want to be a part of. Wins or losses, that team, we’re always together.”

Inubos ni Dowtin ang last season nila sa Lakeland Magic, kung saan tinulungan ang organization sa NBA G League championship. Lumaro din siya sa Orlando sa Las Vegas Summer League at nanatili sa team sa kabuuan ng training camp.

“He has put in so much work,” lahad ni Magic head coach Jamahl Mosley. “He hadn’t played a lot of minutes. He played in a couple of early games in the preseason and your hat goes off to guys like that who continue to put the work in. He never changed the way he has worked.

TNT muling kakatok sa PBA All-Filipino Cup Championship

October 14, 2021 jake

WAGI kapwa ang Talk ‘N Text sa San Miguel Beer, 100-90, at Meralco kontra Magnolia Pambansang Manok, 102-98, noong Miyerkoles (Game 5) sa kanilang magkahiwalay na best-of-seven semifinal series ng 2021 PBA Philippine Cup.

Parehong impresibo ang naging pagwawagi ng Tropang Giga at Bolts na nasa ilalim kapwa ng MVP Group at ginanap sa DHVSU gym sa Bacolor, Pampanga. Muling lumamang ang Katropa ni coach Chot Reyes, 3-2, sa serye nila laban sa Beermen na nagdala sa prangkisa para sa isang panalo na lamang tungo sa All-Filipino Finals.

Lamang pa rin ang Hotshots sa Bolts sa kanilang serye, 3-2, subalit para sa maraming tagasunod ng koponan, ipinamalas ng mga bata ni coach Norman Black na may kakayahan silang manalo sa semis at isaayos ang kauna-unahang All-MVP Group finale sa 46th PBA season.

Muling haharapin ng Katropa ang Beermen ni coach Leo Austria sa Game 6 ngayong araw, at tulad ng Hotshots ni basketball guru Chito Victolero na makakatapat naman ang Bolts, sisikapin nila na tapusin na ang serye. Misyon naman ng SMB at Meralco na palawigin pa ang Round of 4 hanggang Game 7 sa Linggo.

Tingin ng marami, mas malaki ang tsansa ng Bolts na ma-extend ang kanilang serye laban sa Hotshots, kung pagbabasehan ang inilaro ng mga alaga ni coach Norman sa Game 5 kung saan pinaikutan nina Aileen Maliksi, Nards Pinto at Chris Newsome ang kanilang mga guwardiya para masiguro ang panalo.

Sa panig ng Katropa, nilampaso ng kababalik lamang na 39-anyos na si Kelly Williams at ng injured na si Poy Eram ang ipinagmamalaki ng Beermen na si six-time MVP June Mar Fajardo sa kabuuan ng 48-minutong pagtutuos.

Inamin mismo ni TNT coach Chot ang kahalagahan nina Willliams at Erram sa naturang panalo. “They were of big help providing extra bodies to battle San Miguel giants June Mar Fajardo and Moala Tautuaa.”

Sa tatlong koponang ari ni MVP Group boss, businessman-sportsman Manny V. Pangilinan, na TNT, Meralco at North Luzon Expressway, tanging ang Katropa pa lamang ang nakalasap ng kampeonato sa kauna-unahang liga propesyonal sa bansa at Asya. Pitong beses nang nakapag-uwi ng korona ang TNT na naglaro din sa ilalim ng bandila ng Mobiline, 7-Up/Pepsi Cola.

Samantala, wala pang naipanalong titulo ang Meralco at NLEX, bagama’t may tatlong tropeo na bilang runner-up ang Bolts.

SMB, MERALCO HIHIRIT NG GAME 7

October 14, 2021 jake

Ni ANN ENCARNACION

MAIBAGAHE na kaya ng TNT at Magnolia ang ika-apat na panalo tungo sa 2021 PBA Philippine Cup Finals, o makapwersa ng decider Game 7 ang kanilang mga karibal na San Miguel at Meralco?

Iyan ang malalaman ngayon sa Game 6 sa pagitan ng Tropang Giga at Beermen sa alas-3 ng hapon, at Hotshots at Bolts sa alas-6 ng gabi sa DHVSU gym sa Bacolor, Pampanga.

Parehong angat ng isang game (3-2) ang TNT kontra SMB, at Magnolia kontra Meralco, at kapwa nangangailangan ng isang panalo na lang upang makuha ang dalawang silya sa finals.

Ngunit batid din ng Tropang Giga at Hotshots na hindi magiging madali ang daan tungo sa kampeonato lalo’t parehong palaban din ang kanilang mga katapat na Beermen at Bolts.

Nagbalik si Kelly Williams mula sa pagsunod sa health at safety protocols habang binalewala ni Poy Erram ang sakit na nararamdaman sa cheekbone upang tulungan ang Tropang Giga na makuha ang ikatlong panalo kontra Beermen, 110-90, noong Miyerkoles.

Tinapos naman ni Bolts Allein Maliksi ang sinimulan ng mga kakampi na sina Chris Newsome at Nard John Pinto upang iwasan ang maagang pagbabakasyon nang magwagi laban sa Hotshots, 102-98, at ma-extend ang semifinal series nila.

BUHAY KO, IPUSTA MO!

October 14, 2021 jake

HINDI naging kalugod-lugod para sa hanay ng healthcare workers ang patuloy na pagbalewala ng administrasyong Duterte sa panawagang pagbabago sa kagawarang butbot ng bulilyaso at katiwalian.

Sa sobrang pagkadismaya, ang mga doktor at nars na direktang sumasagupa sa pandemya habang nilulustay ng mga taong gobyerno ang kaban ng bayan, nagdeklara na ng isang malawakang panawagan laban sa pag-abuso at katiwalian.

Sa inilunsad na Indignation at Call to Action laban sa katiwalian, giit ng iba’t ibang grupo ng mga propesyonal sa larangan ng kalusugan – taympers muna sa nakawan.

Bagama’t hindi na bago ang paghihimagsik kontra korapsyon ng mga Pilipino, kakaibang laban ang matutunghayan dahil sa unang pagkakataon, pati ang mga doktor at nars nais nang makigulo. Ang kanilang puting unipormeng sukdulan sa kalinisan, isasabak na rin sa maruming lansangan.

Ang sektor na dating ayaw sumali, bubungad na sa harapan ng mga rally. Tama na! Sobra na ang sigaw nila sa pumupusturang hari. Dangan naman kasi, buhay ng mga Pilipino ang inilalagay sa kompromiso. Ang pondong pansagip buhay, hayun kabi-kabila ang paglulustay.

Tulad ng dati, deadma lang ang Pangulo sa panawagang sibakin ang mga itinalaga sa pwesto. Sukdulang awayin pati ang mga mambabatas sa Kongreso makaraang anomalya sa gobyerno ay isa-isang nabisto.

Para sa mga doktor, ang trabaho nila’y manggamot at tiyakin ang kalusugan ng bayan – kesehodang sino pa ang nakaupo sa Palasyo.

Pero sa pananalasa ng pandemya, tila sinabotahe ang hanay nila. Pinagod, pinuyat, inilagay sa peligro ng nakahahawang sakit, inalipusta, pinagdudahan at ang masakit – pati kanilang pinagpaguran ay ‘di pa binabayaran.

Marami na ang pumanaw sa hanay ng healthcare workers sa gitna ng giyera kontra pandemya. Mga nahawaan sa pagtupad sa tungkuling sinumpaan. Ang sagot ng gobyerno, may perang inilaan sa kanilang mga naulila.

Marami na rin ang sumuko at nagpasyang magbitiw sa kawalang malasakit ng namumunong baliw.

Bakit kailangan pang pumanaw ang mga doktor at nars para makuha ang kanilang pinaghirapan?

Sa patuloy na pagbabalewala sa kanilang panawagan, hindi malayong maubos ang mga nagtataguyod ng ating kalusugan at direktang sumasagupa sa nakamamatay na karamdaman. At pag nagkataon, sino na ang hahalili sa kanilang trabahong iiwan?

Simple lang naman ang kanilang kahilingan, ang linisin ang kagawaran at sibakin ang mga sangkot sa katiwalian.

DEATH TOLL SA TD MARING UMAKYAT SA 30, 14 MISSING

October 14, 2021 jake

PINANGANGAMBAHANG lolobo pa ang bilang ng mga nasawi sa ilang araw na pananalasa ng bagyong Maring sa MIMAROPA at Northern Luzon na nagdulot ng pagbaha at pagguho ng lupa.

Sa inilabas na Situational Report No. 5 ng National Disaster Risk Reduction Management Council, kahapon ng umaga ay 30 na ang bilang ng mga nasawi habang 14 ang patuloy na pinaghahanap.

Sa nasabing bilang, 19 na ang kinumpirma ng NDRRMC habang bina-validate pa ang ibang iniulat na nasawi.

Sa 14 na nawawala, labing tatlo ang kumpirmado na ng ahensiya.

Nabatid na 1,775 families o 7,370 ang displaced individuals na tumuloy sa 124 evacuation centers mula sa Regions 1, 2, 3, 6, MIMAROPA, Caraga at Cordillera Autonomous Region.

Tinataya namang pumalo na sa P692,035,694 ang produktong agrikultura na napinsala ng Bagyong Maring sa Regions 1, 2, CAR at iba pa. (JESSE KABEL)

Pangontra sa sexual abuse BABAENG PULIS SA CHECKPOINT

October 14, 2021 jake

KUNG sadyang nais ng Philippine National Police (PNP) na matuldukan ang mga insidente ng pang-aabuso ng kapulisan sa kanilang mga itinakdang checkpoints, panukala ng isang kongresista – babaeng pulis ang italaga.

Gayunpaman, may alternatibo si House strategic intelligence committee chair Rep. Johnny Pimentel, lalo pa aniya’t batid niyang limitado lamang ang bilang ng mga babaeng pulis sa hanay ng PNP.

Giit niya, kung sadyang hindi kayang magdeploy ng all-women police sa mga checkpoint ng PNP, magtalaga ng isa sa bawat lugar kung saan mahigpit ang pagbabantay kaugnay ng patuloy na banta ng pandemya.

“Camp Crame has to put a stop to these horrible police abuses against helpless girls and young women,” ani Pimentel matapos makapagtala ng panibagong kaso ng pang-aabuso ng isang pulis sa checkpoint.

Partikular na tinukoy ng mambabatas insidenteng kinasangkutan ng isang Staff Sgt. Robin Manganga na gumahasa umano sa isang babaeng rider na kanyang hinuli sa checkpoint dahil sa pagmamaneho ng walang lisensya, sa Mabalacat, Pampanga noong Oktubre 8.

Aniya, marami pang insiteng tulad nito ang naganap bago pa ang kinasangkutan ni Sarhento Manganga.

“In October last year, then Lt. Jimmy Fegcan, the deputy police chief of San Miguel, Bulacan, was accused of raping a 24-year-old woman who was apprehended for a curfew violation and for going out without a quarantine pass,” ani Pimentel.

Hunyo 2020 naman aniya ng gahasain ng mga suspek na sina Staff Sergeants Randy Ramos at Marawi Torda ang dalawang dalagitang edad 15 at 18 matapos silang mahuli sa curfew violation sa Cabugao, Ilocos Sur.

“The 15-year-old victim was later gunned down and killed by motorcycle-riding assailants while on her way home after following their complaint at the police station,” ayon sa mambabatas.

Bunsod nito, nanawagan si Pimentel sa PNP na huwag ipagkatiwala lamang sa mga lalaking pulis ang pagmamando sa mga checkpoint upang maproteksyunan ang mga kababaihan.

“The PNP has enough female officers to lead checkpoint teams, considering that they now comprise 17 percent of the entire force,” pahabol ni Pimentel. (BERNARD TAGUINOD)

CASH AID SA MAGSASAKA NA NAPINSALA NI ‘MARING’

October 14, 2021 jake

DAHIL sa malaking pinsala sa agrikultura na aabot sa mahigit P600 milyon dulot ng bagyong Maring na rumagasa sa ilang lugar sa bansa, iginiit ni Sen. Cynthia A. Villar ang agarang pinansiyal na tulong sa mga Pilipinong magsasaka.

Base sa pinakahuling data ng Department of Agriculture (DA), naapektuhan ng Bagyong Maring ang 29,063 magsasaka at mangingisda na ang volume ng production loss ay 36,354 metric tons (MT). Napinsala rin ang 32,882 ektaryang agricultural areas sa Cordillera Administrative Region, Ilocos Region, Cagayan Valley, Central Luzon, Bicol Region at Western Visayas.

Bukod sa pinakahuling bagyo, ang mababang presyo ng palay at ang COVID-19 pandemic ang ilan din sa mga dahilan upang bigyan ng pinansiyal na tulong ang mga magsasaka na apektado ang buhay at kita sa mga ganitong hamon.

Kasalukuyang hinihintay pa ang lagda ni President Rodrigo Duterte para maisabatas ang Cash Assistance to Filipino Rice Farmers Act of 2020 na pakikinabangan ng may 1.673 milyong maliliit na magsasaka.

Isinulong ni Villar, chairman ng Senate Agriculture and Food Committee, para ma-institutionalize ang pagbibigay sa rice farmers ng sobrang koleksyon ng Bureau of Customs (BOC) mula sa P10-billion Rice Competitiveness Enhancement Fund (RCEF).

“The Cash Assistance for Filipino Rice Farmers Act of 2020 recommends that any amount in excess of the P10-B RCEF collection by the BOC shall automatically be given as cash assistance to rice farmers who are tilling 2 hectares or less of rice land, which is estimated at 1.673 million as listed in the Registry System of Basic Sectors (RSBS),” ayon kay Villar.

Iginiit ni Villar na ang financial subsidy sa mga magsasaka ay alinsunod sa mandato ng Republic Act 11203 o An Act Liberalizing the importation, Exportation or Trading of Rice or the Rice Tarification Law.

Patuloy rin aniyang nahaharap ang Filipino rice farmers sa mga hamon dulot ng liberalization ng rice importation noong 2019, at ang mga nakapipinsalang bagyo na sumisira sa sakahan at ang COVID-19 pandemic. (ESTONG REYES)

P3.00 DAGDAG PASAHE TABLADO SA COMMUTERS

October 14, 2021October 14, 2021 jp admin

HAYAGANG tinutulan ng isang grupong kumakatawan sa mga pasaherong Pilipino ang isinusulong ng mga tsuper na P3.00 dagdag pasahe sa minimum fare.

Sa isang pahayag, nilinaw ng grupong Lawyers for Commuters Safety and Protection (LCSP) na hindi sila kontra sa petisyon para sa dagdag pamasahe lalo pa’t lingguhan na ang naitatalang dagdag presyo sa mga produktong petrolyo.

Gayunpaman, dapat umanong bigyang proteksyon at unawain ang kinasasadlakan ng mga pasahero.

Matatandaang naghain ng petisyon ang ilang driver at operator sa tanggapan ng Land Transportation Franchising and Regulatory Board (LTFRB) para taasan ang pamasahe dahil sa sunud-sunod na pagtaas ng produktong petrolyo.

Ayon kay Atty Ariel Inton na tumatayong pangulo ng LCSP, piso lamang ang naangkop sa dagdag pasahe sa mga pampublikong sasakyan, kasabay ng giit na marapat tulungan pa rin ng gobyerno

sa ibang paraan ang mga nagdurusang tsuper at operators na hindi halos aniya makaagapay dahil sa pinaiiral na limited capacity ng mga pampasaherong sasakyan tulad ng mga dyip at bus.

Nauna ng inihayag ng LTFRB na posibleng umabot sa P1.26 ang maging minimum fare hike para sa mga pampublikong sasakyan base sa kanilang kwenta.

Ayon kay LTFRB executive director Joel Bolano, maaaring matugunan ang problema sa pamamagitan ng akreditasyon ng mga karagdagang gas stations kung saan ang mga PUV drivers ay maaaring makinabang sa kanilang subsidiya sa gasolina. (LILY REYES)

Bilyong ‘off-budget’ na tubo itinulong sana sa mga pasyente DOH KINASTIGO SA PANININGIL NG GOV’T HOSPITALS

October 14, 2021 jake

KINASTIGO ni Senador Panfilo Lacson ang Department of Health (DOH) kung paano nasisikmura ng mga pampublikong ospital na singilin pa ang kanilang pasyente ngayong may pandemya samantalang bilyon-bilyon naman ang “off-budget” na kita nito sa ilang nakaraang taon.

Pinuna ito ni Lacson nitong Miyerkoles sa kanyang interpelasyon sa panukalang badyet ng Department of Health (DOH) para sa 2022.

Giit ni Lacson, kung malaki naman pala ang kinikita nila ay pwede itong pambayad sa mga gastusin sa ospital ng mahihirap na pasyente lalo na ang mga nawalan ng hanapbuhay dahil sa pandemya.

“Why would we still charge patients hospitalization fees at a time of pandemic? Should it not be that the amount be used to cushion the suffering of our people who are confined in government hospitals?” dagdag ni Lacson, na sinang-ayunan naman ni DOH Secretary Francisco Duque III.

“Hindi ba parang may kaunting konsensya issue rito? We’re not using the budget yet we’re charging patients,” diin ni Lacson.

“I think a review of these off-budget accounts is in order para maipuno natin sa pangangailangan,” aniya.

Para kay Lacson, senyales na ito na may mali sa pamamahala ng mga pampublikong ospital.

Ayon sa Budget Expenditure and Sources of Financing (BESF), lumalabas na may P448.439 bilyon na “retained income for 2021 hospital fees” ang DOH para sa 2021.

Aminado naman si Duque na nagulat din siya sa halagang ito at nangakong titignan ang pinagmulan ng nasabing kita.

Ikinagulat din ni Philippine Heart Center executive director Joel Abanilla ang pagkalaki-laking halaga ng kita na ito ng mga pampublikong ospital.

Ang off-budget accounts sa ilalim ng BESF ay ang mga retained income o resibo na ibinibigay ng DOH galing sa lahat ng ‘retained hospitals’ na kumikita sa pamamagitan ng: hospital fees, mga gamot, rent/lease income, seminar/training fees, certification fees, kita galing sa mga hostels/dormitories at iba pang pasilidad, printing at publication, at iba pang business income. Anomang uri ng paggastos ay naka-kategorya lamang bilang “Augmentation of MOOE and CO.”

Nilinaw rin kalaunan ni Duque na ang off-budget account para sa 2021 ay nagkakahalaga lamang ng P21.3 bilyon sa halip na P448 bilyon dahil mali ang naunang sinumite ng Eastern Visayas Medical Center kung saan nailagay nito na P448 bilyon ang dapat sana ay P448 milyon lamang.

Aniya, makikipag-ugnayan ang DOH sa Department of Budget and Management para maitama ang mga numero.

Sa kabila nito, sinabi naman ng DOH na susuriin pa rin nila ang mga kinikita ng ospital dahil malaking halaga ng pera ang nakita rito.

Ayon kay Lacson, ang off-budget accounts ay nagkakahalaga ng P4.789 billion noong 2016, P9.092 billion noong 2017, P6.156 billion noong 2018, P7.667 billion noong 2019, at P8.035 billion noong 2020.

“We are among the few countries without zero billing in government hospitals. In countries like Cuba, citizens need not pay for hospitalization if they are confined,” banggit ni Lacson.

Sa kabila nito, sinabi naman ni National Kidney Transplant Institute director Rose Marie Rosete-Liquete na ang kanilang service cases ay walang balance billing kahit sa mga may kaso ng COVID-19. (ESTONG REYES)