KASABAY ng pagdiriwang ng Independence Day sa Linggo, 122,985 job vacancies ang bubuksan sa publiko sa pamamagitan ng 23 job fair sites sa buong Pilipinas na maaaring makita sa ble.dole.gov.ph.
Samantala, kabilang sa listahan ng ‘ in demand jobs” at maraming bakante sa iba’t ibang bansa at maging dito sa Pilipinas ang mga nurse.
Sa Laging Handa public Briefing, sinabi ni Assistant Regional Director Alejandro Inza Cruz ng DOLE Region 3, bukod sa mga nurse, mataas din ang demand sa factory workers, household workers, karpintero, electrician, mason at cleaner.
“Sa atin pong local, sa Region III po, ang top 10 po ay kinabibilangan ng management training, customer service representative, teammate positions, senior crew, sewer, sales representative, sales consultants, service crew, customers technical support representative at mga cash sales representative po. Kung titingnan po natin ang talaan sa national level, ang overseas employment po, kinabibilangan po ng top vacancies ang mga nurse, factory workers, household workers, carpenters, electrician, mason at cleaner, ‘ litanya nito.
“Kung titingnan naman po natin kung saan-saang bahagi po ng mundo ito ay makikita, ang top destination po ay kinabibilangan po ng Middle East, Asia and Europe po at ang Australia,” dagdag na pahayag nito sabay sabing “So, ito po iyong pinaka-latest na talaan po na nakalap po ng Bureau of Local Employment sa ating 16 regions all over the Philippines po.”
Sa ngayon, mayroong 27,509 na overseas job orders base na rin sa pakikipag-ugnayan sa 73 licensed private recruitment agencies for overseas employment. (CHRISTIAN DALE)
206 
