LALONG nanggigigil ang liderato ng Mababang Kapulungan ng Kongreso sa mga nagkakalat ng fake news matapos palutangin na tinabla ng gobyerno ang dagdag na subsistence allowance ng mga sundalo.

“This is a budol, a big lie! These false claims deceive our soldiers and undermine their trust in the government. But the truth is clear—this increase is funded, secured, and guaranteed under the 2025 budget,” ani Deputy Speaker David Suarez.

Ayon sa mambabatas, mismong si Pangulong Ferdinand “Bongbong” Marcos aniya ang nag-atas sa Kongreso na itaas sa P350 ang daily subsistence allowance mula sa dating P150 kaya isinama na ito sa 2025 General Appropriations Act (GAA).

Katumbas umano ito ng P10,500 kada buwan na bukod sa sahod ng mga sundalo at ipinatutupad na ng Armed Forces of the Philippines (AFP).

“We won’t let lies undermine our soldiers. The funding is secured, the commitment is strong, and they will get what they deserve. Enough of this budol! Our soldiers risk their lives every day. They deserve respect, not lies meant to confuse and demoralize them,” ani Suarez.

Ang Kamara ay bumubuo na ng batas para panagutin ang mga nagpapakalat ng fake news sa pamamagitan ng pagpaparehistro sa social media accounts ng lahat ng mga Pilipino katulad ng ginawa sa SIM Card Law.

Iginiit ng mga mambabatas na panahon na para magkaroon ng regulasyon sa paggamit sa social media dahil inaabuso umano ito ng ilan dahil wala silang pananagutan.

Kasabay nito, umapela si Suarez sa taumbayan na beripikahin muna ang lahat ng mga nababasa sa social media platforms bago ipasa sa iba dahil nagkalat umano ang fake news peddlers sa bansa ngayon. (PRIMITIVO MAKILING)