Sa ordinaryong mga pagkakataon, ang kandidato na hindi nanalo sa eleksyon ay dapat tanggapin ang resulta ng botohan at tumanggap ng pagkatalo.

Ngunit, hindi ordinaryo ang nangyaring halalan 2019. Bago pa man ang kampanya, nakita natin na nangangampanya at gumagastos na ng milyones ang ilang kandidato sa mga TV at radio advertisements. At sa loob ng 90-araw na kampanya, sobra-sobra ang naging gastos ng mga kandidato sa pinapayagan na campaign spending, kasama na ang patalastas sa TV at radyo.

Nakita natin kung paano ginamit ang pera at resources ng gobyerno upang ikampanya ang mga kandidato ng administrasyon. Mula sa paglabag sa regulasyon sa mga posters hanggang sa pagbili ng boto, tila bulag at inutil ang Commission on Elections sa pagsawata nito.

Nakita natin kung paano aktibong siniraan, tinakot, hinaras, ng administrasyong Duterte ang mga progresibong mga kandidato at oposisyon. Kahit ang vote buying ay binibigyang katwiran ng pinakamataas na opisyal ng ating bayan.

Nakita natin kung paano tinakot ng presidente at ng mga alyado nito ang mga lokal na kandidato na huwag suportahan at huwag payagang mangampanya ang oposisyon at ang mga progresibong kandidato sa kanilang mga lugar.

Nakita natin kung paano ginamit ang AFP at PNP sa pangangampanya laban sa mga progresibong grupo.

Naglabasan ang mga black propaganda materials laban sa Bayan Muna at iba pang mga kandidato ng Makabayan. At sa isang pagkakataon ay mismong Philippine National Police o PNP mismo ang namimigay. Nakita natin kung paano pinatay ala-tokhang ang mga kampanyador at tagasuporta ng Bayan Muna at ni Neri Colmenares mula pa lamang ng huling bahagi ng 2018, upang pilayin at takutin ang mga botante at tagasuporta. Nakita natin kung paano ang mismong araw ng eleksyon ay batbat ng iregularidad at kawalan ng transparency. Ang napakalalaking isyu sa botohan at bilangan ay nagtatanggal ng kredibilidad at tiwala sa nangyaring halalan. Madaling tumanggap ng pagkatalo sa malinis at malayang eleksyon, ngunit hindi ito ang nangyari.

Natalo si Colmenares sa bilangan, ngunit magpapatuloy ang ating laban para sa demokrasya, soberanya, at hustisya! (Kakampi Mo ang Bayan / TEDDY CASIÑO)