MATAGUMPAY na natapos ng Armed Forces of the Philippines (AFP), kasama ang United States Pacific Command (USPACOM) at Japan Maritime Self-Defense Force (JMSDF), ang 17th Multilateral Maritime Cooperative Activity (MMCA) na isinagawa sa West Philippine Sea mula Hulyo 21 hanggang 25.
Lumahok ang Pilipinas sa maritime exercise gamit ang BRP Antonio Luna (FFG-15), Philippine Navy AW109 helicopter, Philippine Air Force FA-50 fighter aircraft, TC-90, A-29B Super Tucano, C-208B aircraft, at Sokol Search and Rescue helicopter.
Nagdeploy din ang Philippine Coast Guard ng BRP Melchora Aquino (MRRV-9702) at BRP Malabrigo (MRRV-4002).
Samantala, isinabak ng USPACOM ang USS Santa Barbara (LCS-32) kasama ang MH-60S helicopter at P-8A aircraft, habang ipinadala naman ng JMSDF ang JS Yuudachi (DD-103).
Ayon kay AFP Public Information Office Chief Col. Xerxes Trinidad, kabilang sa limang araw na aktibidad ang iba’t ibang advanced maritime interoperability exercises tulad ng Communication Exercises (COMMEX), Replenishment at Sea (RAS), Division Tactics (DIVTACS), Officer of the Watch Maneuvers, Rotary Wing Deck Landing Qualifications (DLQ), Photo Exercise (PHOTEX), Vertical Replenishment/Cross-Deck Landing, at Fly-by Operations.
Sinabi ni Trinidad na higit pang pinagtibay ng ika-17 MMCA ang umiiral na partnership ng mga kalahok na bansa sa pagsusulong ng kapayapaan, katatagan at seguridad sa Indo-Pacific Region.
Aniya, ipinakikita rin nito ang patuloy na pangako ng AFP sa pagsusulong ng freedom of navigation at overflight at sa pagtutol sa ilegal, mapilit, agresibo at mapanlinlang na mga aktibidad sa West Philippine Sea.
(JESSE RUIZ)
101 
