(NI HARVEY PEREZ)

INATASAN ni Justice Secretary Menardo Guevarra, ang bagong  Bureau of Corrections (BuCor) chief na iprayoridad ang paglilinis sa katiwaliang nilikha ng implementasyon ng  good conduct time allowances (GCTA).
Ang kautusan ay ginawa ni Guevarra matapos mag-courtesy visit si bagong talagang BuCor Director General Gerald Bantag sa kanyang tanggapan, Miyerkoles ng umaga.

“I told him to focus on three major objectives, in the order of urgency: clean up the GCTA mess; full computerization; and stop illegal drug trade inside,” ayon kay Guevarra.

Sinabi ni Justice Undersecretary Markk Perete na inisyal pa lamang ang pag-uusap  ni Guevarra at Bantag, habang nakabimbin pa ang lahat ng  documentary requirements para maging epektibo ang appointment ni Bantag.

Bago ang pagkakatalaga kay Bantag, pansamantalang pinangasiwaan ng DOJ ang operasyon ng BuCor.

Nabatid na si Bantag ay naging kontrobersiyal matapos nitong masangkot sa ilang kaguluhan at ng maging jail warden ito ng Paranaque kung saan 10 inmate ang nasawi matapos  magkaroon ng noise barrage sa jail dahil gusto nitong ihiwalay ang mga drug offenders na inmate.

Itinalaga siya ni Pangulong Rodrigo Duterte bilang Director ng BuCor, kamakalawa.