BAWAL na ang community pantries kung walang “koordinasyon” ang mga organisador nito sa mga pamahalaang lokal sa Metro Manila (MM).

Nangangahulugang obligado nang ipaalam ng mga organisador sa MM sa mga pamahalaang lokal upang makatulong ang huli sa pagpapairal ng mga alituntunin laban sa coronavirus disease-2019 (COVID-19).

Ang kautusang koordinasyon ay nakasaad sa Resolution No. 21-08, Series of 2021 ng Metro Manila Council (MMC) na pinagpasyahan nitong Biyernes.

Ang MMC ay organong tagapagbalangkas ng Metropolitan Manila Development Authority (MMDA) ng mga patakaran at alituntuning kikilalanin at ipatutupad ng lahat ng labingpitong alkalde sa MM.

Ang bagong kautusan ng mga alkalde ay kaparehas ng posisyon ng Department of the Interior and Local Government (DILG).

Inilabas ang resolusyong naghihigpit sa pagpila ng mga kumukuha ng produkto sa community pantries makaraang dagsain ng mahihirap ang community pantry na inilunsad ng artistang si Angel Locsin sa Barangay Holy Spirit, Quezon City.

Isinagawa ang pantry noong Abril 22, kaarawan ni Locsin ngunit, sobrang dami ng mga taong nagsitungo.

Kabilang sa mga pumila ang senior citizen na balut vendor na binawian ng buhay matapos himatayin dala ng matinding siksikan at init.

Ipinaliwanag sa MMC Resolution na: “While the organizers of community pantries exemplify collective charity and concern for the plight of the underprivileged and are truly worthy of emulation, support, and praise, the primordial minimum public health standards under the prevailing community quarantine must remain paramount”.

Nabanggit din na ang pakikipag-ugnayan ng mga naglulunsad ng community pantries sa mga pamahalaang lokal ay layong hindi mabasura ang tagumpay ng enhanced community quarantine (ECQ) sa MM at sa apat na katabing lalawigan (Rizal, Laguna, Cavite at Bulacan) at maging ang modified ECQ dahil nabalewala ang “prohibition on mass gatherings, observance of social distancing, and the wearing of face masks and face shields”.

Nilinaw naman ni MMDA Chairman Benjamin “Benhur” Abalos, Jr. na ang “advance coordination would allow LGUs to set up measures to ensure the observance of physical distancing and other public health protocols in community pantries”.

“Also, community pantries’ adherence to the prevailing health guidelines is also part of the Filipino bayanihan spirit that it is promoting,” susog ng opisyal.

Walang binanggit si Abalos na parusa kung lalabagin ang kautusan ng MMC.

“As the community pantries intend to extend assistance to our kababayans, let us be reminded that aside from giving food at this time, one of the noblest kind of help is making sure that they are not at risk of acquiring the virus which, at worst, can cost their lives,” diin pa ni Abalos.

Ipinaalala rin niya na bawal lumabas ang mga edad 17 pababa at 65 pataas, base sa alituntunin ng Inter-Agency Task Force for the Management of Emerging Infectious Diseases (IATF-EID). (NELSON S. BADILLA)