(SAKSI NGAYON NEWS TEAM)

DAPAT magsalita si House Speaker Martin Romualdez kaugnay sa mga kumakalat na ulat na kinokopo ng iilan sa Kamara ang mga proyekto na pinag-uugatan ng korupsyon.

Sa impormasyong nakalap ng SAKSI Ngayon mula sa isang hindi nagpabanggit ng pangalan na insider sa Kamara, umaaray na umano ang mga kontratista dahil ang leadership na lang ng Kamara ang nag-uusap sa budget pagdating sa mga proyekto at ‘nawala na sa picture’ ang mga kontratista at ilang kongresista.

Nangunguna umano sa mga pinaglalagakan ng pondo ang Department of Public Works and Highways (DPWH).

Ito ay dahil sa katotohanang nananatili ang pork barrel ng mga mambabatas bagaman itinatanggi ng mga ito. Taong 2013, idineklara ng Supreme Court na unconstitutional ang pork barrel.

Kamakailan, tinawagan ng pansin ng Commission on Audit (COA) ang DPWH dahil sa mga naantala o hindi natapos na proyekto sa target completion date nito “as of end 2022” na nagkakahalaga ng 60 bilyong piso.

Sa annual audit report ng COA sa DPWH, sinabi ng komisyon na hindi natapos o hindi nakumpleto ang 1,798 projects sa itinakdang contract time o completion date, habang ang 413 na iba pa na nagkakahalaga ng P27.47 bilyon ay sinuspinde.

Tinuran pa rin ng COA na ang 90 DPWH projects na nagkakahalaga ng P5.1 bilyon ay terminated o para sa terminasyon habang ang 94 proyekto naman na nagkakahalaga ng P3.55 bilyong piso ay hindi nasimulan noong nasabing taon.

“These over 2,300 projects cover locally-funded infrastructure projects, school buildings, and Farm-to-Market Roads (FMR),” ayon sa COA.

“Perusal of the report on the status of projects showed that significant delays in the implementation of the projects were caused by numerous suspension orders, time extensions and variation orders issued by the DPWH offices,” ang sinabi ng COA sa report nito.

Inisa-isa naman ng DPWH sa COA ang mga dahilan ng pagkaantala ng mga proyekto at kabilang dito ang COVID-19 pandemic.

Ayon sa COA, ang mga dahilan ng DPWH para sa pagkaantala ng mga proyekto ay “not all valid.”

“Except for the COVID-19 pandemic and adverse weather conditions, the other identified causes of the delay in the implementation of infrastructure projects reflect the inadequacy of planning, supervision and monitoring of management relative to the project implementation,” ayon sa COA.

“With the long years of exposure and experience of the DPWH in the implementation of infrastructure projects, adequate planning should have been considered regarding problems in RROW and conditions over the project location which are the perennial causes of the delays in the implementation of projects,” dagdag na pahayag nito. (May dagdag na ulat si CHRISTIAN DALE)