NITONG Martes, June 25, tumuntong ang Kapuso actor na si Alden Richards sa bakuran ng kalabang Kapamilya Network, ang ABS-CBN Compound sa Quezon City.

Sinamahan siya rito ng leading lady niya sa kanyang latest movie, si Kathryn Bernardo. “Welcome to ABS-CBN,” pagbati ng Kapamilya aktres kay Alden. Hindi man ito ang kanyang unang pagtuntong sa naturang compound, nasambit pa rin ni Alden na, “Medyo surreal na nandito ako ngayon. Nandito kami ni Kath to shoot ng mga video plugs and ‘yung mga digital shoot.”

Isinama ni Kathryn si Alden sa opisina ng Star Cinema kung saan sila binasbasan ng isang pari, at para na rin ipagdasal ang success ng upcoming movie nila na Hello, Love, Goodbye. Nag-lunch din ang dalawa kasama ang Star Cinema managing director na si Olivia M. Lamasan.

Tapos ay naki-meet si Alden kay Carlo Katigbak (ABS-CBN president and CEO) at kay ABS-CBN chairman Mark Lopez. Ang Hello, Love, Goodbye ay ipalalabas sa July 31.