NAGDESISYON ang Inter-Agency Task Force (IATF) na palawigin ang pilot implementation ng Alert Level System sa National Capital Region (NCR) hanggang Oktubre 15, 2021.

Sa pagpupulong ng IATF nitong Huwebes, inaprubahan din nito ang rekomendasyon na i-expand ng karagdagang 10% ang “allowable indoor capacities” ng dine-in services, in-person religious services, at personal care services sa mga lugar na nasa ilalim ng Alert Level 4 para lamang sa fully vaccinated individuals.

Sa kapareho pa ring pulong, inaprubahan ng IATF ang muling pagbubukas ng fitness studios at gyms sa limitadong 20% capacity para sa mga fully vaccinated individual.

Kailangan lamang na ang lahat ng gym workers ay fully vaccinated.

Ang kliyente at service providers ay dapat na palaging nakasuot ng face mask at hindi dapat payagan ang group activities.

“Further, establishments allowed to operate under Alert Level 4, which have been awarded the Safety Seal Certification shall be allowed additional venue capacity of 10 percent beyond the prescribed venue or seating capacity,” ayon kay Presidential spokesperson Harry Roque.

Inaprubahan din ng IATF ang pilot rollout ng pagbabakuna sa mga kabataan na may edad na 12 hanggang 17 years old gamit ang bakunang pinagkalooban ng Emergency Use Authorization ng Food and Drug Administration.

Ang pilot rollout ay magsisimula sa Oktubre 15, 2021 sa ilalim ng “phased approach” na idedetermina ng National Vaccination Operations Center.

Kinatigan at pinagtibay naman ng IATF, base sa direktiba ng pangulo ang pagbubukas ng national vaccination program sa general population nationwide. Ito’y dahil na rin sa determinasyon ng National Task Force Against COVID-19 at Vaccine Cluster nito.

Samantala, ang community quarantine classifications para sa buwan ng Oktubre ay naisapinal na.

Sa ilalim ng modified enhanced community quarantine (MECQ) mula Oktubre 1-15, 2021 ang mga lalawigan ng Apayao, Kalinga, Batanes, Bataan, Bulacan, Cavite, Lucena City, Rizal, Laguna, Naga City, at Iloilo Province.

Ang mga sumusunod naman ay nasa ilalim ng general community quarantine (GCQ) “with heightened restrictions” mula Oktubre 1-31, 2021: Abra, Baguio City, Ilocos Sur, Pangasinan, Cagayan, Isabela, City of Santiago, Nueva Vizcaya, Quirino, Quezon, Batangas, Bacolod City, Capiz, Iloilo City, Lapu-Lapu City, Negros Oriental, Bohol, Zamboanga del Norte, Zamboanga del Sur, Cagayan de Oro City, Misamis Oriental, Davao del Norte, Davao Occidental, Butuan City, at Surigao del Sur.

Ang Davao de Oro ay nasa ilalim din ng GCQ with heightened restrictions subalit mula Oktubre 1-15, 2021 lamang.

Nasa ilalim naman ng GCQ mula Oktubre 1-31, 2021 ay Ilocos Norte, Dagupan City, Benguet, Ifugao, Tarlac, Marinduque, Occidental Mindoro, Oriental Mindoro, Puerto Princesa, Albay, at Camarines Norte para sa Luzon. Para naman sa Visayas: Aklan, Antique, Guimaras, Negros Occidental, Cebu City, Cebu Province, Mandaue City, Siquijor, at Tacloban City.

Habang para sa Mindanao, iyong mga nasa ilalim ng GCQ ay Zamboanga Sibugay, Zamboanga City, Misamis Occidental, Iligan City, Davao City, Davao Oriental, Davao del Sur, General Santos City, Sultan Kudarat, Sarangani, North Cotabato, South Cotabato, Agusan del Norte, Agusan del Sur, Dinagat Islands, Surigao del Norte, Cotabato City, at Lanao del Sur.

Ang natitirang bahagi ng Pilipinas ay nasa ilalim ng modified general community quarantine (MGCQ).

Classified countries

Samantala, inilabas naman ng IATF ang updated list ng “countries/jurisdictions/territories” na kasama sa Red, Yellow, at Green List para sa Oktubre 1-15, 2021. Ang bansang Bermuda ang tanging nasa Red List, habang ang 49 bansa ay nasa Green List.

Ang mga bansang nasa Green List ay ang mga sumusunod : American Samoa, Burkina Faso, Cameroon, Cayman Islands, Chad, China (mainland), Comoros, Republic of the Congo, Djibouti, Falkland Islands (Malvinas), Hungary, Madagascar, Mali, Federated States of Micronesia, Montserrat, New Zealand, Niger, Northern Mariana Islands, Palau, Poland, Saba (Special Municipality of the Kingdom of Netherlands), Saint Pierre and Miquelon, Sierra Leone, Sint Eustatius, Taiwan, Algeria, Bhutan, Cook Islands, Eritrea, Kiribati, Marshall Islands, Nauru, Nicaragua, Niue, North Korea, Saint Helena, Samoa, Solomon Islands, Sudan, Syria, Tajikistan, Tanzania, Tokelau, Tonga, Turkmenistan, Tuvalu, Uzbekistan, Vanuatu, at Yemen.

“All other countries/jurisdictions/territories not listed above are in the Yellow List,” ayon pa rin kay Sec. Roque.

Pinayagan na rin ng IATF ang community healthcare workers na gumalaw sa loob, papasok at palabas sa mga lugar na nasa ilalim ng granular lockdown kung ang kanilang institusyon ay hindi kayang magbigay ng accommodations para sa kanila. (CHRISTIAN DALE)