CAVITE – Arestado ng Cavite police ang isang lalaki habang pinaghahanap ang dalawang kasamahan nito na pinaniniwalaang mga suspek sa paghuhukay ng butas papasok sa loob ng isang pawnshop sa bayan ng Silang noong Lunes ng hapon.

Hawak na pulisya ang suspek na si alyas “Dandle” habang tinutugis pa ang dalawang kasamahan nito, dahil sa reklamo ni Jhovanie Morcilla ng Villarica Pawnshop.

Ayon sa ulat, dakong alas-4:20 ng hapon nang mapansin ng empleyado ng Villarica Pawnshop sa Brgy. Bulihan, Silang, Cavite branch ang isang butas sa kanilang tanggapan.

Agad nilang ipinaalam sa Silang Police ang insidente at base sa imbestigasyon, isang butas ang hinukay papasok sa loob ng nasabing pawnshop.

Natunton sa follow-up operation ang pinaghihinalaang mga suspek na naghukay na nagresulta sa pagkakaaresto kay Dandle habang pinaghahanap ang dalawang kasamahan nito.

(SIGFRED ADSUARA)