CAVITE – Tinutugis ng Cavite Police ang suspek sa pagpatay sa isang lalaki na binaril habang namimitas ng saging sa banana plantation sa bayan ng General Mariano Alvarez (GMA) sa lalawigang ito, noong Lunes ng hapon.

Hinihinalang may ilang oras nang patay nang madiskubre ang biktimang si Robert Macaysa y Acdal, nasa hustong edad, ng Barangay Kua, GMA, Cavite dahil sa tama ng baril sa katawan.

Inaalam pa ang pagkakakilanlan ng suspek na tumakas makaraan ang pamamaril.

Ayon sa ulat ni Police Staff Sergeant Bobbie Balazo ng GMA Police Station, namimitas ng saging ang biktima sa isang maliit na plantasyon ng saging sa Sitio Tamanli, Barangay Kua, nang barilin ito ng suspek dakong ala-1:35 ng hapon.

Inaalam pa ng pulisya kung may kaugnayan sa pagpitas ng biktima ng saging sa lugar ang dahilan ng pamamaril.

(SIGFRED ADSUARA)